Bir otbasy Alakóldegi aralda qalyp qoıǵan
ASTANA. KAZINFORM – Abaı oblysynyń qutqarýshylary Alakóldegi araldardyń birinde qalyp qoıǵan tórt adamdy, onyń ishinde bir balany jaǵaǵa aman-esen evakýatsııalady.
Tótenshe jaǵdaılar mınıstrliginiń málimetinshe, oqıǵa Alakól kóliniń akvatorııasyn profılaktıkalyq patrýldeý kezinde anyqtalǵan.
Belgili bolǵandaı, demalýshylar mingen jalǵa alynǵan shaǵyn kólemdi keme tehnıkalyq aqaýǵa ushyrap, olar ózdiginen jaǵaǵa orala almaǵan.
– TJM qyzmetkerleri júzý quralyn paıdalanyp, tórt adamdy, onyń ishinde bir balany jaǵaǵa qaýipsiz evakýatsııalady. Evakýatsııalanǵandarǵa medıtsınalyq kómek qajet bolǵan joq, – delingen mınıstrlik habarlamasynda.
TJM azamattarǵa sýǵa shyǵar aldynda júzý quralynyń tehnıkalyq jaǵdaıyn mindetti túrde tekserýdi, kemeni shamadan tys júktemeýdi, qutqarý keýdeshesin paıdalanýdy jáne aýa raıy jaǵdaıyn eskerýdi eske saldy.
Aıta keteıik, Alakóldegi parom apatynan keıin áıel eki aıaǵynan aıyryldy.
