«Bir ornynda tura almady»: Air Astana ushaqqa otyrǵyzbaǵan jolaýshyǵa qatysty túsinik berdi
ALMATY. KAZINFORM – Air Astana kompanııasy áleýmettik jelide taraǵan vıdeoǵa qatysty túsinik berdi.
Jelidegi taraǵan vıdeo kadrlaryna súıensek, onda jolaýshy belgisiz sebeptermen reıske kire almaǵanyn jáne alkogol men esirtkige qatysty medıtsınalyq tekserýden ótýge daıyn ekenin aıtady.
Air Astana áýekompanııasy 26 shilde kúni KS969 reısiniń jolaýshysyn «Almaty-Shymkent» baǵyty boıynsha tasymaldaýdan bas tartqanyn rastady. Sebebi, onyń masań kúıi men júris-turysy bortserikterdi alańdatqanyn jetkizdi.
«Mundaı jaǵdaıda ushaqqa otyrý jolaýshynyń densaýlyǵyna qaýip tóndirip, ózge de jolaýshylarǵa yńǵaısyzdyq tudyrýy múmkin edi. Atalǵan fakti boıynsha jelilik polıtsııa bóliminiń qyzmetkerleri qajetti aktilerdi resimdeý úshin shaqyryldy. Keıinnen saraptama qortyndysy qandaǵy alkogoldiń baryn rastady», - dep habarlady Air Astana áýekompanııasynan.
