Bir operator 100 drondy basqara alady: jańa júıe synaqtan ótti
ASTANA. KAZINFORM — «Spassk» oqý ortalyǵynyń polıgonynda otandyq ushqyshsyz júıeler men robottandyrylǵan keshenderdiń demonstratsııalyq synaqtary ótti.
Qazaqstandyq kásiporyndar ázirlegen perspektıvaly tehnıkalyq úlgiler jaýyngerlik jaǵdaılarǵa barynsha jaqyn ortada tekserildi. Tájirıbelik-áskerı paıdalaný nátıjeleri olardy elimizdiń Qarýly kúshterine qabyldaý máselesin qaraý kezinde eskeriletin bolady.
Synaq barysynda urys alańynda keń aýqymdy mindetterdi oryndaı alatyn zamanaýı robottandyrylǵan keshender tanystyryldy. Olar oq-dáriler men ınjenerlik quraldardy jetkizýge, jaralanǵandardy evakýatsııalaýǵa, júkterdi tasymaldaýǵa arnalǵan. Sonymen qatar qoıylǵan mindetterge qaraı PKT pýlemetimen jáne basqa da atys qarýlarymen jabdyqtalýy múmkin.
Synaq barysynda ushqyshsyz ushý apparattarynyń tobyn basqarý júıesiniń kórsetilimine erekshe nazar aýdaryldy. Keshen bir operatorǵa bir mezgilde nysanalardy joıýǵa arnalǵan 100-ge deıingi dronnan turatyn topty basqarýǵa múmkindik beredi. Sondaı-aq júıe ushqyshsyz ushý apparattaryna qarsy is-qımyl mindetterin oryndaıtyn mamandardy daıarlaý barysynda da qoldanylady.
Synaqtarǵa radıoelektrondyq kúres bólimsheleri de qatysty. Bul otandyq ázirlemelerdiń qazirgi zamanǵy radıoelektrondyq basý quraldarynyń áserine tózimdiligin baǵalaýǵa múmkindik berdi.
– Búginde ushqyshsyz tehnologııalar men robottandyrylǵan keshender zamanaýı urys alańynyń ajyramas bóligine aınalyp keledi. Tájirıbelik-áskerı paıdalaný otandyq ázirlemelerdiń múmkindikterin obektıvti baǵalaýǵa, olardy odan ári jetildirý baǵyttaryn aıqyndaýǵa jáne Qarýly kúshterde qoldaný perspektıvalary jóninde salmaqty sheshim qabyldaýǵa múmkindik beredi, – dedi demonstratsııalyq synaqtar komıssııasynyń tóraǵasy polkovnık Ámir Qasenov.
Ázirleýshi kompanııanyń ókili Dmıtrıı Popovtyń aıtýynsha, usynylǵan barlyq keshender qazirgi zamanǵy talaptar men ushqyshsyz júıelerdi qoldanýdyń praktıkalyq tájirıbesin eskere otyryp jasalǵan.
– Bizdiń mindetimiz – áskerı qyzmetshilerge logıstıka men evakýatsııadan bastap, atystyq qoldaý kórsetý jáne ushqyshsyz tehnologııalardy qoldanýǵa deıingi keń aýqymdy mindetterdi oryndaı alatyn senimdi ári tıimdi sheshimderdi usyný. Polıgondaǵy synaqtar áskerı qyzmetshilerden keri baılanys alyp, tehnıkany odan ári jetildirýge múmkindik beredi, – dep atap ótti ol.
Mundaı synaqtardy ótkizý otandyq qorǵanys-ónerkásiptik keshenniń damýyna, zamanaýı tehnologııalardy engizýge jáne Qarýly kúshterdi qarý-jaraq pen áskerı tehnıkanyń perspektıvaly úlgilerimen jaraqtandyrýǵa yqpal etedi.
Aıta ketelik otandyq kýrsanttar drondarǵa qarsy tehnologııany ázirlegeni týraly jazǵan edik.
