Bir ólshem úlken alý — Balaǵa aıaqkıimdi qalaı tańdaǵan durys
ASTANA. KAZINFORM — Balaǵa aıaqkıim tańdaǵanda ata-analar kóbine onyń ádemiligi men ólshemine mán beredi. Alaıda aıaqkıimniń yńǵaılylyǵy men tabanynyń qalyńdyǵy da mańyzdy. Óıtkeni durys tańdalmaǵan aıaqkıim balanyń tabanyna keri áser etýi múmkin. Aıaqkıimdi bir ólshem úlken alýǵa bola ma? Maıtaban qaı jasqa deıin qalypty sanalady? Qandaı jaǵdaıda ortopedke qaralý qajet? Osy jáne ózge de suraqtarǵa joǵary sanatty balalar travmatolog-ortopedi Jomart Súleımenov Kazinform tilshisine jaýap berdi.
Balanyń tabany qaı jasqa deıin qalyptasady?
Kishkentaı balanyń tabany jalpaq bolyp kórinse, ata-analar alańdaýy múmkin. Alaıda bul mindetti túrde maıtabandyq belgisi emes. Óıtkeni balanyń tabany jasyna qaraı birtindep ózgeredi.Jomart Súleımenovtiń aıtýynsha, balanyń tabany 1–5 jas aralyǵynda damıdy. Sondyqtan bes jasqa deıin onyń jalpaq bolýy qalypty jaǵdaı sanalýy múmkin. Dáriger maıtabandylyqtyń tuqym qýalaıtyn jáne júre paıda bolatyn túrleri bar ekenin de atap ótti.
Balanyń tabanyndaǵy ózgeristerdi baqylaý úshin ortopedke ýaqtyly qaralǵan jón. Maman ásirese alǵashqy jyly josparly tekserýlerden ótýdiń mańyzdy ekenin aıtady.
— Bir jasqa deıin balany 1, 3, 6 jáne 9 aılyǵynda ortopedke kórsetý qajet. Al bir jastan keıin jylyna bir ret profılaktıkalyq tekserýden ótkizgen durys, — dedi Jomart Súleımenov.
Aıaqkıimdi bir ólshem úlken alǵan durys pa?
Balanyń aıaǵy tez ósetindikten, keı ata-analar aıaqkıim kóp uzamaı tar bolyp qalmasyn dep, bir ólshem úlkenin satyp alady. Alaıda ortoped mundaı tańdaýdy quptamaıdy. Onyń aıtýynsha, aıaqkıim balanyń qazirgi aıaq ólshemine saı bolýy kerek.
Ólshemnen bólek, aıaqkıimniń tabanyna da nazar aýdarý qajet.
— Aıaqkıim tabanynyń qalyńdyǵy keminde 1 santımetr bolǵany durys. Sebebi tabany tym juqa ári jumsaq aıaqkıim balanyń taban pishininiń ózgerýine ákelýi múmkin, — dedi ortoped.
Sondyqtan aıaqkıim satyp alarda onyń syrtqy kórinisimen shektelmeı, pishini men balaǵa qanshalyqty yńǵaıly ekenin de eskergen jón.
Qandaı jaǵdaıda ortopedke qaralý qajet?
Balanyń aıaǵy aýyrsa nemese júrgende tez sharshasa, muny nazardan tys qaldyrmaǵan durys. Mundaı shaǵymdarmen qatar, taban pishinindegi ózgerister de dárigerge qaralýǵa sebep bolýy múmkin.
Jomart Súleımenovtiń aıtýynsha, myna belgilerdiń biri baıqalsa, ortopedke mindetti túrde qaralý qajet:
· Taban pishininiń ózgerýi;
· Júrgende tabannyń aýyrýy;
· Aıaqta múıizgektiń paıda bolýy;
· Júrgende aıaqtyń tez sharshaýy.
Al eshqandaı shaǵymy joq balalardy da jylyna bir ret profılaktıkalyq tekserýden ótkizip turǵan jón.
Ortopedııalyq aıaqkıim barlyq balaǵa qajet pe?
Keı ata-analar balasynyń tabany durys qalyptasýy úshin arnaıy ortopedııalyq aıaqkıim nemese ultaraq satyp alady. Alaıda olardyń qajet ne qajet emestigin dáriger tekserýden keıin ǵana anyqtaı alady.
— Aldymen plantografııa jasalady. Bul tekserý kezinde balanyń taban izi túsirilip, onyń pishini baǵalanady. Sodan keıin ortoped arnaıy aıaqkıim nemese ultaraq qajet pe, sony sheshedi, — dep túsindirdi Jomart Súleımenov.
Sondyqtan ortopedııalyq aıaqkıim men ultaraqty óz betinshe tańdamaǵan durys.
Aıaqkıimdi qanshalyqty jıi aýystyrý qajet?
Bala ósken saıyn aıaq ólshemi de ózgeredi. Soǵan baılanysty buryn yńǵaıly bolǵan aıaqkıim ýaqyt óte kele tar bolyp qalýy múmkin. Sondyqtan aıaqkıim satyp alǵannan keıin de onyń balaǵa saı keletinin qadaǵalap otyrý qajet.
Jomart Súleımenov aıaqkıimniń ólshemi men yńǵaılylyǵyn ár alty aı saıyn tekserýge keńes beredi. Sondaı-aq onyń pishinine, túrine jáne aýa raıyna sáıkestigine nazar aýdarǵan jón.
Buǵan deıin ortoped Oljas Baınazarov balalardaǵy maıtaban men valgýstyq deformatsııanyń aıyrmashylyǵyn túsindirip, aıaq pishinindegi ózgeristerdiń qaı kezde qalypty sanalatynyn aıtqan edi.
