Bir oqýshynyń tamaqtanýynyń ortasha quny qansha
ASTANA. KAZINFORM – Óńirler arasynda azyq-túlik ónimderi baǵasynyń deńgeıinde edáýir aıyrmashylyq bar.
Bul týraly Májilis depýtattarynyń saýalyna Premer-mınıstrdiń orynbasary — Ulttyq ekonomıka mınıstri Serik Jumanǵarınniń jaýabynda aıtylǵan.
— Ulttyq statıstıka bıýrosynyń derekterine sáıkes, óńirler arasynda da, jekelegen oblystardyń ishinde de azyq-túlik ónimderi baǵasynyń deńgeıinde edáýir aıyrmashylyq bar ekeni baıqalady. Mekteptegi tamaqtandyrýdyń quny óńirdiń erekshelikteri men onyń ekonomıkalyq múmkindikterin eskere otyryp qalyptastyrylady. Bilim berý uıymdarynda satylatyn taǵamdar men ónimderdiń quny qaǵıdalarǵa sáıkes jáne aǵymdaǵy ınflıatsııa deńgeıin eskere otyryp aıqyndalady, — dedi vıtse-premer.
Onyń dereginshe, 2026 jylǵy 1 qańtardan bastap jergilikti atqarýshy organdar baǵa dınamıkasy men statıstıkalyq derekter negizinde mekteptegi tamaqtaný qunyn qaıta qarady.
— Tamaqtanýdyń ortasha quny bir bilim alýshyǵa 775 teńge (2024 jyldyń basynda — 635 teńge, 2025 jyly — 697 teńge). Bul kórsetkish jyl saıyn ınflıatsııa deńgeıine sáıkes ındeksteledi. Sonymen birge, Kásipkerlik kodekske sáıkes (17-bap) qazaqstandyq óndirýshilerdi qoldaý, atap aıtqanda otandyq taýarlar men qyzmetterdiń óndirisin damytý úshin qolaıly jaǵdaılar jasaý sharalary qarastyrylǵan. Qaǵıdalarǵa sáıkes ónim berýshini tańdaýda sońǵy jeti jyldaǵy tıisti óńirdegi jumys tájirıbesi eskerile otyryp, jergilikti azyq-túlik óndirýshilerine basymdyq beriledi, — dedi Serik Jumanǵarın.
Buǵan deıin elimizdegi mektepterde tamaqtaný talaptary jańartylǵan edi.