Bir mıllıard jas estý qabiletinen aıyrylýy múmkin

ASTANA.KAZINFORM —  DDU boljamy boıynsha, 2050 jylǵa qaraı shamamen 2,5 mıllıard adam ártúrli estý máselelerine tap bolady, dep habarlaıdy Kazinform agenttigi.

DDU-nyń Reseıdegi ókildiginiń basshysy Batyr Berdiklychevtiń aıtýynsha, qazirgi ýaqytta 1 mıllıardtan astam jas mýzykany durys tyńdamaý ádeti saldarynan estý qabiletinen aıyrylý qaýpinde tur.

— Óte alańdatarlyq jaǵdaı, 1 mıllıardtan astam jas aýdıony durys tyńdamaǵannyń kesirinen estý qabiletinen aıyrylý qaýpi tónip tur, al bul qaýiptiń aldyn alýǵa bolady, — dedi ol.

Onyń aıtýynsha, 2050 jylǵa qaraı jastardyń shamamen 2,5 mıllıardy ártúrli estý buzylystaryna ushyraýy múmkin, al olardyń keminde 700 mıllıonyna estý qabiletin qalpyna keltirý úshin arnaıy ońaltý qajet bolady.

Estý qabiletiniń joǵalýyna basty sebepterdiń biri — tym qatty dybystardyń áseri, bul estý jasýshalarynyń zaqymdanýyna ákelýi múmkin. Alaıda, estý qabiletin joǵaltýdyń 60%-dan astam jaǵdaıynyń aldyn alýǵa bolady, eger der kezinde tıisti sharalar qoldanylsa. Eń tıimdi aldyn alý sharasy — dybysty qaýipsiz deńgeıde tyńdaý erejelerin saqtaý.

Mýzykany qaýipsiz tyńdaýǵa arnalǵan arnaıy dybys deńgeıi normalary bar, biraq kóptegen jastar bul talaptardy elemeıdi. Bul óz kezeginde estý qabiletin joǵaltý qaýpin arttyrady. Búgingi tańda álem halqynyń shamamen 5%-y estý qabiletiniń joǵalýynan múgedektikke ushyrap otyr.

Aıta ketelik densaýlyq salasyndaǵy derekti jınaý jáne saqtaý júıesi jetildirilmek.