Bir kúndik jalaqyny aýdarý týraly eshqandaı tapsyrma berilgen joq — ákimdik
ASTANA. KAZINFORM — Qarpaıym azamattar men bıznes ókilderi sondaı -aq túrli uıymdardan qaza tapqan áskerı qyzmetshilerdiń otbasyna materıaldyq qoldaý kórsetý jalǵasyp jatyr. Mańǵystaý oblystyq ákimdigi qarajat aýdarý týraly eshqandaı tapsyrma berilmegenin, halyq erikti túrde kómek qolyn sozyp jatqanyn habarlady.
Ákimdik qaza tapqan áskerı qyzmetshilerdiń otbasylaryna materıaldyq qoldaý kórsetkisi keletin azamattar, bıznes ókilderi men uıymdar úshin biryńǵaı qor jumys istep turǵanyn málim etti.
— Bul rette qarajat aýdarý tek erikti túrde júzege asyrylady. Oblys ákimdigi tarapynan azamattarǵa, kásipkerlerge, uıymdarǵa nemese olardyń qyzmetkerlerine qarajat aýdarý týraly eshqandaı tapsyrma, talap nemese nusqaý berilgen joq jáne berilmeıdi. Sondaı-aq qyzmetkerlerdiń bir kúndik jalaqysyn aýdarýy týraly eshqandaı tapsyrma berilgen joq. Jalaqyny kómek retinde aýdarý mindetti emes jáne ár qyzmetkerdiń jeke sheshimi boıynsha ǵana júzege asyrylady, — delingen habarlamada.
Qoldaý kórsetkisi keletin azamattar qordyń resmı rekvızıtteri arqyly qarajatty erikti túrde aýdara alady nemese qaza tapqan áskerı qyzmetshilerdiń týystaryna tikeleı materıaldyq kómek kórsete alady.
— Kómek kórsetý nemese kórsetpeý — ár adamnyń jeke sheshimi. Qarajat aýdarýǵa eshkimdi májbúrleýge bolmaıdy, — dep jazdy ákimdiktiń baspasóz qyzmeti.
Aıta keteıik, Halyq Keńesi músheleri qaza tapqan áskerılerdiń otbasylaryna 815 mln teńge bólgen edi.
Búgin «Ádilet» partııasy qaza tapqan áskerı qyzmetshilerdiń otbasylaryna 1,5 mlrd teńge aýdaratynyn málimdedi.
