«Bir kúndik klınıka» jobasy: densaýlyq saqtaý salasynda jańa reforma
ASTANA. KAZINFORM — Bıyl densaýlyq saqtaý salasynda qandaı oń ózgerister men reformalar júzege asyrylmaq? Bul týraly Úkimettiń baspasóz qyzmeti málim etti.
«Bir kúndik klınıka» jobasy
«Bir kúndik klınıka» jobasy pılottyq rejımde júzege asyrylǵan óńirlerdiń tájirıbesi búkil Qazaqstanǵa taratylady. Ony iske asyrý júkti áıelderdi prenataldy dıagnostıkalaýdyń ınnovatsııalyq ádisteriniń qoljetimdiligin qamtamasyz etýge jáne densaýlyǵynda týa bitti kináraty men hromosomalyq patologııasy bar bala týý qaýpin der kezinde anyqtaýǵa múmkindik berdi. Bir kún ishinde «bir tereze» qaǵıdaty boıynsha prenataldy dıagnostıka jáne tekserý nátıjelerin alý qyzmetteri men ádisteriniń joǵary sapasy júzege asyryldy. Búginge deıin bul múmkindikti 35 myńnan astam áıel paıdalanǵan.
«Uryq medıtsınasy» jobasy
Sonymen qatar Qazaqstanda alǵash ret «Uryq medıtsınasy» jobasy iske asyryldy. Bul – otandyq densaýlyq saqtaý júıesindegi jańa baǵyt. Ol az ınvazıvti protsedýralar arqyly uryqtyń erte patologııalyq jaǵdaılaryn emdeýge jáne túzetýge múmkindik beredi. Búgingi tańda 20 jatyrishilik ota jasaldy. Atalǵan joba 2025 jyldyń 1 qańtarynan bastap búkil respýblıka boıynsha júzege asyrylady.
Eske sala keteıik, buǵan deıin jańa jyl qarsańynda jádel járdem 27 myńǵa jýyq shaqyrtý boıynsha qyzmet kórsetkenin jazǵan bolatynbyz.