Bir kúnde elordada 200-den astam jaıaý júrginshige aıyppul salyndy

ASTANA. KAZINFORM – Bir kúnde elordada jol qozǵalysy erejelerin buzǵan 200-den astam jaıaý júrginshi anyqtaldy.

Atap aıtqanda, jaıaý júrginshilerge qatysty jol-kólik oqıǵalary sanyn azaıtý jáne jol erejeleriniń buzylýynyń aldyn alý maqsatynda elorda aýmaǵynda «Jaıaý júrginshi» aktsııasy uıymdastyryldy. Onyń barysynda jaıaý adamdardyń joldy belgilenbegen jerlerden qıyp ótýi jáne baǵdarshamnyń qyzyl túsine júrýi sekildi ereje buzý derekteri anyqtaldy.

«Joldyń qaýipti ýchaskelerine, kámeletke tolmaǵan jaıaý júrginshilerge jáne samokat pen moped júrgizýshilerine erekshe nazar aýdaryldy. Keıingi kezde joldaǵy qaýipsizdikke úlken qaýip tóndirip turǵan shaǵyn elektr kólik quraldary da nazardan tys qalmady. Kúnine tártip saqshylary jaıaý júrginshilerdiń 200-den 300-ge deıin ereje buzý deregin anyqtaıdy», - delingen Polıtsııa departamenti baspasóz qyzmetiniń málimetinde.

Jyl basynan beri QR Ákimshilik quqyq buzýshylyq týraly kodeksiniń 615-baby aıasynda 17 myńǵa jýyq jaıaý júrginshi jaýapqa tartyldy. Sonymen qatar, atalǵan bapqa sáıkes velosıped, moped jáne samokat tizgindegender de jazalandy.

Buǵan deıin QR Іshki ister mınıstriniń orynbasary Igor Lepeha mopedin memlekettik tirkeýge qoımaǵandarǵa aıyppul salynatynyn aıtty.