Bir qolǵa beriletin SIM-karta sanyn shekteý: nómirdi basqa maqsatta paıdalanǵandar jazalanady
ASTANA. KAZINFORM – Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev bir adamǵa satylatyn SIM-kartanyń sanyn shekteýge qatysty túsinik berdi.
- Osy bastama qazir Májiliste depýtattarmen birge talqylanyp jatyr. 10 SIM-kartadan artyq alsa, júıede qaı maqsatpen bul SIM-kartalardy paıdalanatyny aıqyndalady. Keıbir kompanııalar 100 shaqty SIM-kartany satyp alyp, bir qolǵa beretinin bilemiz, - dedi J.Mádıev Parlament Májilisinde tilshiler suraǵyna jaýap bere otyryp.
Onyń aıtýynsha, osy problemamen kúresý úshin mınıstrlik tıisti usynystar daıyndady.
- Uıaly baılanys operatorlarynda nómirlerdi basqa maqsatta paıdalanyp jatqanyn anyqtaıtyn múmkindikteri bar. Máselen, SIM-kartany tek avtokólikte paıdalanýǵa alyp, osy nómirdi basqa maqsatta qoldanyp júrse, ony trafık boıynsha anyqtaý ońaı. Maqsatsyz paıdalanǵany úshin jaýapkershilik qarastyralady, aıyppul sanktsııasy engizilýi múmkin, - dedi mınıstr.
Budan buryn habarlanǵandaı, búgin Májilis Astana Hub pen Innovatsııalyq tehnologııalar parkin biriktirý týraly zań jobasyn birinshi oqylymda maquldady.