Bir kezderi Mańǵyshlaqta atom stantsııasy tabysty jumys istegen – Sarapshy

ASTANA. KAZINFORM – Qazaqstan halqy atom stantsııasyn salý qajettiligin qoldady. Bul pikirdi otandyq saıasattanýshy Danııar Áshimbaev jazdy.

«Málimetterge súıensek, daýys berýge qatysqan azamattardyń 70%-ǵa jýyǵy atom elektr stantsııasyn salýǵa daýys berdi. Shamamen 30%-y qarsy boldy. Dástúr boıynsha, ekzıt-pýldardyń derekteri ádette erteń jarııalanýy tıis OSK-nyń resmı derekterinen aıtarlyqtaı erekshelenbeıdi. Osylaısha, Qazaqstan halqy atom stantsııasyn salý qajettiligin qoldady degen qorytyndy jasaýǵa bolady (jáne sarapshylardyń pikirinshe, bireý ǵana emes)», - dep jazdy D.Áshimbaev óziniń Telegram paraqshasynda.

Sarapshynyń aıtýynsha, Qazaqstan úshin bul jańa taqyryp emes. Mańǵyshlaqta 25 jyl buryn jabýǵa týra kelgen atom stantsııasy kóptegen jyl boıy tabysty jumys istegen.

«Kóptegen jyl boıy atom energııasyna oralý jobasy talqylandy, biraq únemi saıası erik-jiger jetispedi, sheteldik qysym da el úshin qajetti sheshim qabyldaýǵa múmkindik bermedi. Al qazir, úgit-nasıhat kezeńinde biz AES salý josparlaryn buzyp qana qoımaı, eldegi jaǵdaıdy turaqsyzdandyrýǵa árekettengen úgit-nasıhatshylardyń belsendi jumysyn kórdik», - deıdi saıasattanýshy.

D.Áshimbaev Prezıdent Qasym-Jomart Toqaevtyń máseleni jalpyhalyqtyq talqylaýǵa shyǵarý bastamasyn qoldaý maqsatynda elimizdiń barlyq qoǵamdyq kúshterin shoǵyrlandyrǵan Halyq shtabynyń jumysyn da atap ótti.

«Kórip otyrǵanymyzdaı, el halqy bul sheshimniń qajettigi men mańyzdylyǵyn oń qabyldap, eski fobııalardy da, teris nasıhatty da eńserdi. Aldyn ala derekter ulttyq energetıka men jalpy ekonomıkanyń turaqty damýynyń negizi retinde atom energııasyna oralý jobasyn qoldaýdyń joǵary dárejesin kórsetedi», - dedi sarapshy.

Aıta keteıik, AES qurylysyna kelisim berý boıynsha referendýmnyń ekzıt-pýl derekteri jarııalandy.