Bir kenshi qaza taýyp, ekinshisi jaraqat aldy: Aqmola oblysynda shahtadaǵy apattyń mán-jaıy anyqtalyp jatyr
ASTANA.KAZINFORM - Bestóbe kenishindegi «Batys» shahtasy opyrylyp, bir jumysshy qaza taýyp, taǵy bir jumysshy birneshe jaraqat aldy, dep habarlaıdy Kazinform tilshisi.
Eńbek jáne halyqty áleýmettik qorǵaý mınıstrligi Memlekettik eńbek ınspektsııasy jónindegi komıtetiniń Aqmola oblysy boıynsha departamentiniń habarlaýynsha, 19 naýryz kúni saǵat 10:35–te Stepnogorsk qalasynda «Qazaqaltyn» JShS Bestóbe kenishi fılıalynyń eki jumysshysy jazataıym jaraqat alǵan.
— 700 metrlik Qaırat gorızontynyń 3-blogynyń beriktigin arttyrý úshin aǵash materıaldaryn kóterý kezinde qoımadan (shatyr men borttan) taý massasynyń bir bóligi qulady. Apat saldarynan fılıal qyzmetkerleri jaraqat aldy. Zardap shekkender 13:30–da jer betine shyǵaryldy. Bireýine medıtsınalyq kómek kórsetilip, Stepnogorsk qalasynyń aýrýhanasyna jiberildi. Qaza tapqan ekinshi qyzmetkerdiń denesi sot-medıtsınalyq saraptamaǵa jiberildi, — dep túsindirdi vedomstvo.
Marqumnyń jasy 40-ta, jaraqat alǵany 36-da. Oblystyq densaýlyq saqtaý basqarmasynyń baspasóz qyzmeti habarlaǵandaı, zardap shekken azamatty týystary Stepnogorsk aýrýhanasynan Astanaǵa alyp ketti.
Departament basshysy Amangeldi Ismaılovtyń aıtýynsha, qazirgi ýaqytta oqys oqıǵaǵa baılanysty arnaıy tergeý jónindegi komıssııa qurylǵan. Onyń quramyna memlekettik eńbek jáne ónerkásiptik qaýipsizdik ınspektsııasy departamentiniń ókilderi, jumys berýshi men qyzmetkerlerden turatyn top kirdi.
Aqmola oblystyq polıtsııa departamentiniń baspasóz qyzmeti habarlaǵandaı, Bestóbe kenishi Batys shahtasynda jumysshynyń qaza bolýyna baılanysty «Eńbekti qorǵaý erejelerin buzý, abaısyzda adam ólimine ákelý» baby boıynsha qylmystyq is qozǵaldy. Barlyq mán-jaı anyqtalyp jatyr.
Aıta keteıik, buǵan deıin Ulytaý oblysyndaǵy kenishte jumysshy qaza tapqan bolatyn.