Bir qańǵybas ıtti asyraýǵa kúnine 5 myń teńge jumsalady – Ekologııa vıtse-mınıstri
ASTANA. KAZINFORM – Ótken jyly el aýmaǵynda 247 myń qańǵybas ıt aýlandy jáne olardy zararsyzdandyrýǵa, vaktsınalaýǵa jáne tirkeýge shamamen 20 mlrd teńge qajet. Bul týraly Ekologııa jáne tabıǵı resýrstar vıtse-mınıstri Nurken Shárbıev málim etti.
«Depýtattar buralqy ıtterdi aýlap, ortasyna qaıtarmaýdy usynyp otyr, al qazirgi zańǵa sáıkes ıtterdi aýlaıdy, zararsyzdandyrady, vaktsına egip, qaıta ortasyna jiberedi. Elordadan ózge óńirlerde osy prıntsıppen jumys istep jatyr. Zańdaǵy jańashyldyq qańǵybas ıtti aýlap, 14 kún ustaý, sol ýaqyt aralyǵynda ıesi nemese panajaı tabylmasa ıtti joıý, al ólekseni joıý veterınarlyq-sanıtarlyq tártip boıynsha júzege asyrylady», - dedi Nurken Shárbıev Májilistiń Ekologııa máseleleri jáne tabıǵat paıdalaný komıtetinde ótken «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna ózgerister men tolyqtyrýlar engizý máselelerine arnalǵan dóńgelek ústel barysynda.
Sondaı-aq, vıtse-mınıstr buralqy ıtterdi aýlap, ómir boıy baǵý kerek degen usynystardyń baryn aıtty.
«2023 jyly 1 qyrkúıekten bastap úı janýarlaryn ıeleri tirkep, chıpteý normasy kúshine endi. Eger tirkelgen, ıesi bar ıtti aýlaǵan jaǵdaıda, ony 60 kún boıy ustaıdy jáne ıesine alyp ketýin habarlaıdy. Eýropa basqa da álemdi osy tásil qoldanylady. Ótken jyly el boıynsha 247 myń ıt aýlandy. Eger aýlanǵan ıtterdi tabıǵı jolmen ólgenshe asyraý kerek bolsa, olardy zararsyzdandyrýǵa, vaktsınalaý jáne tirkeýge shamamen 20 mlrd teńge qajet. Oblystar usynǵan statıstıkaǵa sáıkes bir ıtti asyraýǵa kúnine 5 000 teńge jumsalady, al byltyr aýlanǵan 247 myń ıtti asyraýǵa 400 mlrd teńgeniń ústinde qarjy qajet etedi», - deıdi ol.
Eske sala ketsek, jyl basynda Ekologııa jáne tabıǵı resýrstar mınıstri Erlan Nysanbaev eldi mekenderde buralqy ıtterdiń kóbeıýi turǵyndarǵa qaýip tóndirip otyrǵanyn aıtqan edi.
