Bir qaǵazǵa bola 200 shaqyrym júrý: Abaı oblysynyń prokýratýrasy zańsyz talaptyń kúshin joıdy

SEMEI. KAZINFORM — Abaı oblysynda prokýratýra múmkindigi shekteýli balalardyń ata-analaryna qoıylǵan negizsiz talaptardyń kúshin joıdy.

Osyǵan deıin oblystyń Abaı aýdanynda ata-analar qujat tapsyrý úshin Semeıge 200 shaqyrym jol júrýge májbúr bolǵan. Al zań boıynsha bul qujattar múlde talap etilmegen de.

Aýdanda erekshe bilim berýdi qajet etetin 10 bala sabaqty úıden oqyp jatyr. Zańǵa sáıkes, ol úshin dárigerlik-konsýltatsııalyq komıssııanyń qorytyndysy jetkilikti. Biraq mektepter qosymsha psıhologııalyq-medıtsınalyq-pedagogıkalyq konsýltatsııanyń anyqtamalaryn talap etken.

— Ár sapar otbasy úshin aýyr synaq. Sebebi múgedektigi bar balamen qalaǵa jetý ońaı sharýa emes. Kólik jaldaýǵa, jatyn orynǵa aqsha ketedi. Endi osy máseleniń sheshilgenine rızamyz, — deıdi ata-analardyń biri.

Prokýratýra aralasqannan keıin talaptar zańsyz dep tanyldy. Osydan bylaı ata-analar artyq qujattardy sabylyp tasymaı-aq balalaryn úıde oqyta alady.

— Tekserý júrgizip, jaǵdaıdy anyqtaǵan soń, usynys engizdik. Sóıtip, másele sheshildi. Bizdiń mindetimiz — azamattar tap bolatyn kedergilerdi joıyp otyrý, — dep habarlady Abaı oblysy prokýratýrasynan.

Eske salsaq, buǵan deıin Semeıdegi kásiporyn 125 jumysshyǵa zańsyz aıyppul salyp tastaǵany habarlanǵan.