Bir ǵımaratta 3 teatr - Prezıdent bıznes ókilderin aımaqtyq teatrlardy qoldaýǵa shaqyrdy

BÝRABAI. KAZINFORM – Memleket basshysy Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda aımaqtyq teatrlardyń jaı-kúıi týraly másele kóterdi jáne jergilikti bıznes ókilderin teatrlarǵa qoldaý kórsetýge shaqyrdy.

Óz sózinde Prezıdent táýelsizdik jyldary mádenıet salasynda kóp jumys atqarylǵanyn, klassıkalyq jáne zamanaýı mýzykaǵa arnalǵan sáýletti ǵımarattar salynyp, kóptegen teatr ashylǵanyn erekshe atap ótti.

− Qazaqstanda teatr ónerine qyzyǵýshylyq artyp keledi. Zal kórermenge toly, qoıylymdardyń premerasyna bıletter eki-úsh apta buryn satylyp ketedi. Sahna ónerine qushtar jandardyń arasynda jastardyń kóp bolýy kóńilge erekshe qýanysh uıalatady, − dedi Qasym-Jomart Toqaev.

Qazir Qazaqstanda 46 aımaqtyq teatr bar. Alaıda onyń kópshiliginiń jaı-kúıi máz emes. Mysaly, Semeıde bir ǵımaratta 3 birdeı teatr syǵylysyp otyr.

− Ásirese, aımaqtarda teatrlardy damytýǵa basa nazar aýdarý kerek. Halqymyzdyń mádenı áralýandyǵyn saqtaýǵa múmkindik beretin orys jáne basqa da ulttyq teatrlardy qoldaý mańyzdy. Elimizde ónerdiń bul túri de tabys ákeletinin dáleldep júrgen jeke teatrlar az emes. Sondyqtan bıznes ókilderin aımaqtaǵy teatrlarǵa belsene qoldaý kórsetýge shaqyramyn, − dedi Memleket basshysy.

Aıta keteıik, Prezıdent memlekettik áleýmettik tapsyrys týraly jańa zań ázirleýdi tapsyrdy.