Bir ǵana vıdeomen qoǵam kózqarasyn 180 gradýsqa ózgertýge bolady – ІІM ókili
ASTANA. KAZINFORM – Qoǵamdyq senim – eń qymbat kapıtal. Bul týraly PR jáne medıa salasynyń kásibı qaýymdastyǵy ótkizgen paneldik sessııada QR Іshki ister mınıstrliginiń ókili Shyńǵys Alekeshev aıtty.
Onyń aıtýynsha, qazirgi tsıfrlyq zamanda jalǵan nemese konteksten julyp alynǵan aqparattyń saldary qoǵamnyń senimine zor nuqsan keltiredi.
– Bir ǵana vıdeomen qoǵam kózqarasyn 180 gradýsqa ózgertýge bolady. Mysaly, Óskemende polıtsııa qyzmetkerlerine qatysty taraǵan vıdeo kópshiliktiń narazylyǵyn týdyrdy. Alaıda keıin bizdiń taraptan beınebaqylaý vıdeolary jarııalanǵan soń, shyndyq basqasha ekeni anyqtaldy. Biraq sol senimdi qalpyna keltirýge kóp resýrs jumsaldy. Senimniń quny – óte joǵary, – dedi ol.
ІІM ókili qoǵam tarapynan ashyqtyqqa degen suranystyń artqanyn atap ótti. Mınıstrlik óz kezeginde tsıfrlyq tehnologııalardy engizý arqyly halyqpen keri baılanysty kúsheıtip keledi.
– Búginde 102 mobıldik qosymshasy jumys isteıdi. Sonymen qatar Kaspi, Halyk jáne eGov platformalarynda «Zań men tártip» atty jańa servıs iske qosyldy. Azamattar foto nemese beınejazbany qosa tirkep, shaǵymyn nebári birneshe batyrmany basyp jibere alady. Eger alǵashqy aıda nebári 500 ótinish tússe, úsh aıdyń ishinde olardyń sany 30 myńnan asty, – dedi Alekeshev.
Shyńǵys Alekeshevtiń aıtýynsha, senimniń negizgi bóligi – jalǵan aqparatpen júıeli kúres. Ol bıyl jalǵan aqparat taratqany úshin 64 adam ákimshilik jaýapkershilikke tartylǵanyn jáne taǵy 14 qylmystyq is tergelip jatqanyn aıtty.
Іs-shara Astana qalasynda ótip jatqan Astana Media Weeek 2025 forýmy asıasynda uıymdastyryldy.
Aıta keteıik, buǵan deıin osy forýmda Qazaqstannyń strımıng ındýstrııasy qalaı damyp kele jatqanyn jazǵan edik.
Kamıla Múlik