Bir formany mindettep, aqsha jınaýǵa bola ma: Ata-analarǵa keńes
ALMATY. KAZINFORM – Memlekettik mektepter ata-anany mektep formasyn naqty bir dúkennen satyp alýǵa mindetteı almaıdy. Sondaı-aq mekteptegi sport sektsııasy men úıirme de tegin bolýy tıis. Bul týraly Almaty qalasy Bilim basqarmasynyń basshysy Sáken Aralbaev aıtty.
Onyń sózinshe, mektep tarapynan naqty bir jetkizýshi nemese dúkennen kıim satyp alýdy talap etý - zańsyz áreket. Bilim ordasy ata-anany mektep formasyn tańdaýda májbúrleı almaıdy. Bıyl Almatydaǵy №222 mektepte mundaı jaǵdaı tirkelgen. Ata-analardyń shaǵymynan keıin basqarma tekserý júrgizip, mektep dırektoryna qatysty tártiptik shara qoldanylǵan.
- Mektep ákimshiliginiń ata-analardy naqty bir dúkenge baryp, belgili bir formany satyp alýǵa májbúrleýge quqyǵy joq. Mundaı jaǵdaı bolyp jatsa, birden bizge habarlap aıtyńyzdar, – dedi Sáken Aralbaev.
Almatyda mektep formasynyń qoıý kók tústi bolýy usynylǵan. Alaıda vedomstvo basshysy bul tek usynys ekenin atap ótti.
Sáken Aralbaev aqyly úıirmeler men sektsııalar boıynsha da pikir bildirdi. Ótken oqý jylynda ata-analar memlekettik mektepterde qosymsha sabaq úshin aqsha talap etkenin aıtyp shaǵymdanǵan.
- Memlekettik mektepterde bilim berý tegin, onyń ishinde qosymsha bilim berý de kiredi. Mektepte sport sektsııasy, shyǵarmashylyq úıirme men basqa da sabaq aqyly bolmaýy tıis, – dedi ol.
Basqarma basshysy mektepte qosymsha sabaqqa aqsha talap etilse, ata-analar aldymen bilim berý uıymynyń ákimshiligine, keıin aýdandyq bilim bólimine nemese tikeleı Almaty qalasynyń Bilim basqarmasyna júgine alatynyn eske saldy.
Buǵan deıin Almaty mektepterinde JI qalaı qoldanylatynyn jazǵanbyz.
