Bir donor jylyna qansha ret qan tapsyra alady
ASTANA. KAZINFORM — Qazaqstanda qan donory bolýǵa nıetti azamattar úshin qan tapsyrý jıiligine qatysty naqty talaptar belgilengen. Bul týraly Transfýzıologııa ǵylymı-óndiristik ortalyǵy Kazinform agenttiginiń resmı saýalyna bergen jaýabynda aıtyp berdi.
Transfýzıologııa ǵylymı-óndiristik ortalyǵy Qoǵammen baılanys jáne yntymaqtastyq bóliminiń basshysy Alma Demeýovanyń sózinshe, donordyń qan nemese onyń komponentterin tapsyrý jıiligi ár azamattyń densaýlyq jaǵdaıyna baılanysty belgilenedi.
— Qazaqstan Respýblıkasynyń qoldanystaǵy talaptaryna sáıkes, donordyń qan nemese onyń komponentterin tapsyrý aralyǵy onyń densaýlyq jaǵdaıyna, medıtsınalyq tekserý nátıjelerine jáne tapsyrylatyn qan komponentiniń túrine qaraı belgilenedi. Osyǵan sáıkes, tolyq qandy er adamdar jylyna alty retke deıin, al áıel adamdar tórt retke deıin tapsyra alady. Al trombotsıtterdi arnaıy apparattyq ádispen ár eki apta saıyn tapsyrýǵa bolady, — dedi spıker.
Sondaı-aq, árbir donatsııa aldynda donor mindetti túrde medıtsınalyq tekserýden ótedi.
— Tekserý qorytyndysyna sáıkes dáriger donordyń densaýlyq jaǵdaıyn baǵalap, qan nemese onyń komponentterin tapsyrýǵa ruqsat beredi. Osylaısha, donorlyqtyń jıiligi ár adamnyń densaýlyq kórsetkishterine baılanysty jeke baǵalanady, — dedi Alma Demeýova.
Bólim basshysynyń aıtýynsha, munda tolyq qannan bólek, trombotsıtterdi apparattyq ádispen tapsyrý tártibi de qarastyrylǵan.
Aıta keteıik, sońǵy 10 jylda elimizde 1,6 mln-nan astam adam qan tapsyrǵan.
