Bir dárigerge myńnan asa adam: Jambyl óńirinde kadr tapshylyǵy baıqalady

ASTANA. KAZINFORM — Jambyl aýdanynda 29 densaýlyq saqtaý nysany jumys isteıdi, biraq olardyń 19-y beıimdelgen ǵımarattarda ornalasqan, dep habarlaıdy Kazinform tilshisi.

Jergilikti ákimdik habarlaýynsha, bul tizimge ortalyq aýdandyq aýrýhana, emhana, «Aısha bıbi» shıpajaıy, toǵyz dárigerlik ambýlatorııa, on bir medıtsınalyq pýnkt jáne alty feldsherlik-akýsherlik pýnkt kiredi.

Medıtsınalyq kadrlar deńgeıi ótken jyldardan ózgermegen — qazirgi tańda aýdan boıynsha barlyǵy 76 dáriger, 310 orta jáne 105 kishi medıtsına qyzmetkeri jumys isteıdi. Aýdandaǵy naqty halyq sany, boljam boıynsha, 100 myńnan asady, al sońǵy resmı statıstıka 2019 jyly 82,9 myń turǵyn bolǵanyn kórsetken. Halyq sanyna súıensek, bir dárigerge orta eseppen myńnan astam turǵyn keledi.

Aýdandyq ınfraqurylymdy jańartý máselesin sheshý maqsatynda jóndeý jumystary jalǵasyp keledi. Aısha bıbi aýyldyq okrýginiń Qarataý aýylynda jańa FAP salyndy, onyń quny 268,3 mln teńge. Alaıda aýdandyq aýrýhananyń negizgi ǵımaratynyń kúrdeli jóndeýi áli jobalaý kezeńinde. Jobalyq-smetalyq qujattar 2024 jyldyń kúzinde daıyndalǵan, al obektiniń quny 2,6 mlrd teńge dep baǵalanǵan.

Statıstıkaǵa áser etken mańyzdy faktorlardyń biri — buryn Taraz qalasyna aýdarylǵan jeti densaýlyq saqtaý nysany: aýyldyq aýrýhana, bes ambýlatorııa jáne bir medıtsınalyq pýnkt.

Eske salsaq, buǵan deıin Jambyl oblysynda dárigerlerdiń tapshylyǵy baıqalatynyn habarlaǵan edik.

Medıtsınalyq kadr tapshylyǵy Qazaqstanda: Úkimet qandaı qoldaý sharalaryn usynady