Bir dáriger birneshe mamandyq boıynsha patsıent qabyldaı ala ma – mınıstrlik jaýaby
ASTANA. KAZINFORM – Áleýmettik jelilerde bir dárigerdiń bir-birinen bólek birneshe medıtsınalyq mamandyq boıynsha patsıent qabyldaýy qyzý talqylanyp júr. Osyǵan baılanysty Kazinform tilshisi bir dárigerdiń birneshe mamandyq boıynsha jumys isteýine zańnamada ruqsat bar ma jáne oǵan qandaı talap qoıylatyny jóninde Densaýlyq saqtaý mınıstrligine suraý saldy.
QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti tóraǵasy orynbasary Jandos Ádilhannyń aıtýynsha, dáriger birneshe medıtsınalyq mamandyq boıynsha patsıent qabyldaı alady. Biraq ol jumys isteıtin ár mamandyq boıynsha tıisti maman sertıfıkatyna ıe bolýy kerek.
– Qazir elimizde 56 medıtsınalyq mamandyq boıynsha kásibı standart bekitilgen. Kásibı biliktilik dárigerdiń belgili bir mamandyq aıasynda jumys isteýi úshin qajetti bilimin, daǵdysyn jáne quzyretin aıqyndaıdy. Sertıfıkattaý rásimine sáıkes, dáriger árbir mamandyq boıynsha sertıfıkatqa, ıaǵnı klınıkalyq praktıkamen aınalysýǵa ruqsat beretin qujatqa ıe bolýy tıis, - dep túsindirdi tóraǵa orynbasary.
Vedomstvo ókiliniń habarlaýynsha, qazir jańa mamandyq boıynsha maman sertıfıkatyn alý úshin dáriger sol baǵyt boıynsha rezıdentýrany aıaqtaýy kerek. Rezıdentýra – belgili bir mamandyq boıynsha kásibı biliktilik alýǵa nemese dárigerdiń burynǵy kásibı biliktiligin ózgertýge arnalǵan joǵary oqý ornynan keıingi medıtsınalyq bilim berý deńgeıi. Rezıdentýra baǵdarlamasy mamandyqqa baılanysty 2 jyldan 4 jylǵa deıin sozylady.
– Buǵan deıin basqa tártip boldy. 2022 jylǵy 15 qarashaǵa deıin jańa mamandyq boıynsha sertıfıkatty qaıta daıarlaýdan ótkenin rastaıtyn qujat negizinde alýǵa múmkindik boldy. Mundaı qaıta daıarlaý keminde 860 saǵattyq oqýdy talap etti. Sol kezeńde tájirıbeli dárigerler óziniń qoldanystaǵy kásibı beıini – terapevtik, pedıatrııalyq nemese hırýrgııalyq baǵyt sheńberinde qaıta daıarlaýdan ótip, jańa mamandyq boıynsha sertıfıkat ala aldy. Sondyqtan búginde bir dárigerde bir beıinge jatatyn eki nemese odan da kóp mamandyq boıynsha sertıfıkat bolýy múmkin, - dedi Jandos Ádilhan.
Budan bólek, ol 2021 jyldan bastap sertıfıkattaý kýrstary engizilgenin eske salyp ótti. Olar mamandyq beıini sheńberinde dárigerdiń qosymsha kásibı bilimin, biligi men daǵdylaryn keńeıtýge jáne tereńdetýge baǵyttalǵan. Mundaı kýrstardyń kólemi 10 kredıtten, ıaǵnı 300 akademııalyq saǵattan bastalady.
– Osylaısha, bir dárigerdiń birneshe mamandyq boıynsha patsıent qabyldaýynyń ózi zań buzýshylyq bolyp sanalmaıdy. Alaıda ol ár mamandyq boıynsha klınıkalyq praktıkamen aınalysýǵa quqyq beretin tıisti sertıfıkatqa ıe bolýy tıis, - dedi tóraǵa orynbasary.
Aıta keteıik, buǵan deıin osteopat dáriger belgilegen emdeý sharasyn ne sebepti almastyra almaıtynyn jazǵan edik.
