Bir chempıonatta bes medal: Ulttyq ulan sarbazy júzýden eki altyn, úsh kúmis aldy
ASTANA. KAZINFORM — QR ІІM Ulttyq ulany 6636 áskerı bóliminiń áskerı qyzmetshisi qatardaǵy jaýynger Nurtas Álibekov 12–13 qyrkúıek kúnderi Astanada ótken «Masters» sanatyndaǵy júzýden Qazaqstannyń ashyq chempıonatynda bes medal jeńip aldy. Bul týraly qýatty qurylymnyń baspasóz qyzmeti málim etti.
Óz jas sanatynda ulandyq 200 metrge keshendi júzýden jáne 100 metrge brass ádisimen júzýden birinshi oryn ıelendi. Sondaı-aq 50 metrge erkin júzý, 50 metrge brass ádisimen júzý jáne 100 metrge shalqalap júzýden úsh kúmis medalǵa qol jetkizdi.
— Chempıonattyń este qalarlyq sátteriniń biri áskerı qyzmetshi qazaqstandyq júzýdiń tanymal ókilderimen bir jolda synǵa tústi. Ol ulttyq quramanyń jattyqtyrýshysy, halyqaralyq dárejedegi sport sheberi Gennadıı Gordıenkomen jáne 2016 jylǵy Rıo Olımpıadasynyń chempıony Dmıtrıı Balandınmen bir júzý jolaǵynda baq synady. Jas sportshy úshin mundaı básekelestik óz múmkindigin taǵy bir márte synap, joǵary nátıje úshin kúresýge múmkindik berdi, — delingen habarlamada.
Tamyz aıynda Býrabaı kólinde ótken X-WATERS Kazakhstan 2026 halyqaralyq júzý jarysy da sportshy úshin nátıjeli ótken. Nurtas Álibekov 500 metrge júzýde úshinshi oryn alyp, 3×500 metrlik komandalyq estafetada kúmis júldege ıe boldy.
Ulandyq úshin júzý áldeqashan áýesqoılyqtan asyp, dene daıyndyǵynyń mańyzdy bóligine aınalǵan. Jattyǵý men jarys kezinde qalyptasqan tártip pen tózimdilik onyń áskerı qyzmetinde de óz kómegin tıgizip jatyr.
Aıta keteıik, buǵan deıin Ulttyq ulannyń áskerı qyzmetshisi Qazaqstan kýbogynyń jeńimpazy atanǵan bolatyn.
