Bir búıregin 9 mln teńgege satpaq bolǵan atyraýlyq sotta jaýap berip jatyr
AQTÓBE. KAZINFORM – Atyraý oblysynyń 27 jastaǵy turǵyny bir búıregin 9 mln teńgege baǵalady. Ol 5 mln teńge alyp jatqan berinen ustalyp, sot aldynda jaýap berip jatyr.
Qylmystyq is №2 Aqtóbe qalalyq sotynda qaralyp jatyr. Sottalýshyǵa Qylmystyq kodekstiń «Qylmysqa daıyndalý jáne qylmysqa oqtalý» jáne «Adamnyń aǵzalary men tinderin alyp qoıýǵa májbúrleý nemese zańsyz alyp qoıý» baptary boıynsha aıyp taǵyldy. Іs materıalyna súıensek, sottalýshy 2024 jyldyń maýsym aıynda Telegram arqyly «Búırek donory» kanalyna kirip, habarlama qaldyrady. Sol kezde aqtóbelik polıtsııa qyzmetkerleri aldyn ala kelisilgen adam arqyly baılanysqa shyǵyp, ózara ýaǵdalasady.
- 2024 jyldyń maýsym aıynda Orynbasarov jumyssyz júrip, zańsyz jolmen paıda taýyp, qaryzdaryn jabý maqsatynda habarlandyrý qaldyrǵan. Óziniń aǵzasyn, ıaǵnı, búıregin satý týraly habarlama jarııalaǵannan keıin Orynbasarov tergep-tekserýmen anyqtalmaǵan tulǵalardan usynystar alyp otyrǵan. 2024 jyly 14 qyrkúıek kúni Orynbasarov Atyraý qalasynda bola tura óz erkimen ishki ister organdaryna kómek kórsetken Aqtóbe qalasynyń turǵynymen kelisedi. Búıregin 9 mln teńgege baǵalaıdy. Ol medıtsınalyq komıssııadan ótýge, ol úshin Aqtóbege kelýge ýáde etti. 2024 jyldyń 19 qyrkúıegi kúni Atyraý qalasynan Aqtóbe qalasyna qaraı poıyzǵa bılet alyp, 2024 jyly 20 qyrkúıegi kúni Aqtóbe qalasyna jetti, medıtsınalyq tekserýden ótti. Sol kúni satyp alýshy jalǵa alyp bergen páterge barady. Al 25 qyrkúıek kúni kelisimdi júzege asyrý maqsatynda satyp alýshy 5 mln teńgeni Orynbasarovqa berip, ol polıtsııa qyzmetkerlerine ustaldy. Sóıtip Qylmystyq kodekstiń 24 baby 3 bóligi, 116 baby 1 bóliginde kórsetilgen quqyqbuzýshylyq jasady, - dedi prokýror Ádilet Kenjaly.
Sot otyrysy kezinde sottalýshy da jaýap berdi. Ol qaryzy bolyp, asyǵystyq tanytqanyn aıtty.
- Qaryzym bolyp qaldy. Sol ýaqytta asyǵystyqpen, ashýmen Telegram arqyly jazba qaldyrdym da kanaldan shyǵyp kettim. Ózge atty qoldandym. Maǵan qyrkúıek aıynda habarlasty. Keıin «analız alaıyq» dep aıtty. Analızdi Aqtóbege kelip tapsyrdym. Aqshasyn tóledi, páter jaldap berdi. 25 kúni qolma-qol aqsha bergende ustaldym. 9 mln teńgege kelistik. Otaǵa deıin, keıin bólip beretin boldy. Sol 5 mln teńgeni berip, ketip bara jatqanda ustady. Aqshany sanamadym, qaramadym. Ózim tolyq moıyndaımyn, ókinemin, - dedi sottalýshy.
Ol qazir eshqaıda ketpeı týraly qolhatpen bostandyqtan júr. Otbasyly, eki balasy bar.
Eske salsaq, byltyr elimizde birinshi ret búırekti aıqas transplanttaý otasy jasaldy.
Eske salsaq, byltyr Aqtóbe prokýratýrasy áleýmettik jelige taldaý júrgizip, óz aǵzasyn satpaq bolǵan adamdy anyqtady.