«Bir-birin qutqarmaq bolǵan»: Pavlodarda 6 jumysshynyń ólimine kim kináli ekeni anyqtaldy
ASTANA. KAZINFORM — Pavlodar oblysyndaǵy «Aqtogai Milk» JShS-de alty jumysshynyń qazasyna sebep bolǵan toptyq jazataıym oqıǵaǵa qatysty arnaıy tekserý aıaqtaldy. Bul týraly QR Eńbek jáne halyqty áleýmettik qorǵaý mınıstrligi habarlady.
Vedomstvonyń habarlaýynsha, tekserý barysynda jumysshylardyń biri káriz qudyǵynda kúkirtsýteginen ýlanyp qalǵany anyqtaldy. Oǵan kómek kórsetýge umtylǵan ózge jumysshylar da kezekpen qudyqqa túsken.
Osylaısha, bir-birin qutqarýǵa áreket jasaǵan alty jumysshy kúkirtsýteginen ýlanyp, kóz jumǵan.
Arnaıy komıssııa jumysshylardyń qaýiptiligi joǵary jumystardy qaýipsiz oryndaý boıynsha tıisti oqýdan ótpegenin jáne qajetti jeke qorǵanysh quraldarymen qamtamasyz etilmegenin anyqtady.
— Sonymen qatar káriz qudyǵyndaǵy jumystardy uıymdastyrý kezinde, onyń ishinde avarııalyq jaǵdaı týyndaǵan jáne qutqarý jumystary júrgizilgen kezde qaýipsizdiktiń qajetti deńgeıi qamtamasyz etilmegen. Úkimettik komıssııanyń jumysy qorytyndysy boıynsha jumys berýshi — «Aqtogai Milk» JShS-niń kiná dárejesi 100 paıyz dep belgilendi, — delingen habarlamada.
Arnaıy tekserý nátıjesinde jazataıym oqıǵanyń sebepteri men mán-jaılary anyqtalyp, jaýapty laýazymdy tulǵalar belgilendi. Sonymen qatar anyqtalǵan buzýshylyqtardy joıý jáne mundaı jaǵdaılardyń qaıtalanýyna jol bermeý boıynsha usynymdar ázirlendi.
Mınıstrlik jumys berýshilerdi qudyqtarda, rezervýarlarda jáne basqa da jabyq keńistikterde júrgiziletin qaýiptiligi joǵary jumystardy uıymdastyrý kezinde qaýipsizdik talaptaryna erekshe nazar aýdarýǵa úndedi.
Vedomstvonyń málimetinshe, jumysshylardy qajetti jeke qorǵanysh quraldarymen qamtamasyz etý, olardy qaýipsiz jumys isteý ádisterine oqytý, sondaı-aq avarııalyq jaǵdaılar kezindegi is-qımyldar men qutqarý jumystaryna daıyndaý qajet.
— Qaýiptiligi joǵary jumystardy oryndaý kezinde qaýipsizdik talaptaryn saqtaý — jumys berýshiniń tikeleı mindeti ári jumysshylardyń ómiri men densaýlyǵyn qorǵaýdyń negizgi sharttarynyń biri, — dep atap ótti mınıstrlik.
Eske salaıyq, 2026 jylǵy 20 shildede Pavlodar oblysynyń Jolaman aýylynda ornalasqan kásiporynda alty adam qaza tapty.
Úkimet basshylyǵynyń tapsyrmasymen oqıǵanyń sebebi men mán-jaıyn anyqtaý úshin arnaıy komıssııa quryldy.
Keıinirek tiri qalǵan bir turǵyn aýrýhanadan shyǵatyny habarlandy.
