Qytaıda Kazinform-nyń oqyrmany kóp - Van Tszıan She

QAShQAR.KAZINFORM – CNS Qytaı memlekettik agenttigi «Kazinform» halyqaralyq aqparat agenttigimen birlesip jumys isteýge nıetti. Bul týraly Sıntszıan fılıaly bas redaktorynyń orynbasary Van Tszıan Shen aıtty.

Onyń aıtýynsha, Kazinform men CNS-tiń uqsas jaqtary kóp. Birinshiden, aqparatty shynaıy ári shuǵyl jetkizedi. Óz eliniń memlekettik saıasatyn ustanatyn agenttikterdiń medıa salasynda ózindik qoltańbasy bar.

Sheteldik aqparat kózderi, sonyń ishinde biz de, Qazaqstan jańalyqtaryn Kazinform arqyly bilip, silteme jasap, ózimizde jarııalaımyz.

«Qytaıda Kazinform-nyń oqyrmany kóp. Aqparat birneshe tilde shyǵady. Bul kún saıyn qaryshtap damyp jatqan medıa salasynyń talaby. Kóshten qalmaı damyp jatqan Kazinform agenttigimen birlesip jumys isteýge nıettimiz. Birinshiden, aqparat almasý, ekinshiden, agenttik jýrnalısterine taǵylymdamadan ótýge jaǵdaı jasaý, úshinshiden, «bir beldeý - bir jol» jobasy aıasynda túrli fılmder túsirý, materıal ázirleý jáne taǵy basqalary», - deıdi Van Tszıan Shen.

Sondaı-aq, ol Kazinform ujymyn týǵan kúnimen quttyqtady.

«Bıyl Kazinform aqparat agenttigine - 104 jyl. Bir ǵasyrdan astam tarıhy bar baıyrǵy agenttikti týǵan kúnimen quttyqtaımyz. Halyqaralyq deńgeıden álemdik deńgeıge kóterilýine tilektespiz», - dedi ol.

Aıta keteıik, CNS Qytaı memlekettik aqparat agenttigi qytaı jáne aǵylshyn tilinde aqparat taratady. 30 memlekette menshikti tilshileri bar. Budan bólek, Qytaıdyń árbir provıtsııasynda fılıaly jumys isteıdi.