«Bir beldeý, bir jol»: Qazaqstan men Qytaıdy jalǵaıtyn 3-shi temirjol salynady

ASTANA. KAZINFORM – Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Qazaqstan men Qytaı arasyndaǵy tranzıt jáne kólik qatynasy salasyndaǵy yntymaqtastyqty damytýdyń ózekti tustaryna toqtaldy. 

«Búgin qol qoıylǵan ınnovatsııalar jáne aýyl sharýashylyǵy salasyndaǵy kishi komıtetterdi qurý týraly hattama ekijaqty josparlardyń iske asýyna arqaý bolary sózsiz. Osy qujatta kózdelgendeı, aýyl sharýashylyǵy ónimderin shyǵarýda jáne tereń óńdeýde ózara tıimdi jobalardy júzege asyrý úshin bizdiń Úkimet Qytaı bıznesine qolǵabys kórsetýge ázir», - dedi Murat Nurtileý Qytaıdyń Syrtqy ister mınıstrimen kezdesýden keıin BAQ-qa málimdeme jasap. 

Onyń aıtýynsha, kúrdeli geo-ekonomıkalyq ahýalda tranzıttik jáne kóliktik yntymaqtastyqty damytýdyń ózektiligi ósýde. 

«Qytaıdyń «Bir beldeý, bir jol» bastamasy men strategııalyq mańyzǵa ıe bolǵan Transkaspıı halyqaralyq kólik marshrýty bir-birin tolyqtyryp, ortaq maqsattardy kózdeıdi. Osy tusta, eki eldiń temirjol men avtokólik beketteriniń ótkizý qabiletterin arttyrý jáne 3-shi temirjol ótkelin salý máselelerin dáıekti túrde talqyladyq. Ekijaqty saýda-ekonomıkalyq jáne ınvestıtsııa salasyndaǵy barlyq qadam halyqtarymyzdyń ál-aýqatyn jaqsartýǵa baǵyttalǵan», - deıdi M. Nurtileý. 

Aıta keteıik, búgin Qytaı Halyq Respýblıkasynyń Syrtqy ister mınıstri Van I Qazaqstanǵa resmı saparmen keldi. 

Sapar aıasynda Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileýmen shaǵyn jáne keńeıtilgen quramdaǵy kelissózder júrdi. Sodan soń vedomstvo basshylary ekijaqty qujattarǵa qol qoıdy. 

Qazaqstan Qytaı kompanııalaryn sırek kezdesetin mıneraldardy birlesip ıgerýge shaqyryp otyr. 

Sondaı-aq, Qytaı Qazaqstanmen jasandy ıntellekt salasynda yntymaqtastyqty damytýǵa nıetti.