Bir beldeý, bir jol: Qazaqstan — Qytaı ınvestıtsııalaryn eń kóp tartqan el
ASTANA. KAZINFORM — «Bir beldeý, bir jol» bastamasy aıasyndaǵy Qytaı ınvestıtsııalary rekordtyq deńgeıge jetti. Bul týraly Aýstralııanyń Grıffıt ýnıversıteti men Beıjińdegi Jasyl qarjy jáne damý ortalyǵynyń birlesken zertteý esebinde aıtylǵan.
2025 jyldyń qańtarynan maýsymyna deıin qytaılyq kompanııalar jalpy quny 124 mlrd dollar bolatyn 176 jańa ınvestıtsııalyq jáne qurylys kelisimshartyn jasasty. Bul kórsetkish byltyrǵy jyldaǵy jalpy somadan ($122 mlrd) asyp tústi.
— Bıyl Qytaıdyń belsendiligi pandemııadan keıingi turaqty ósý aıasynda erekshe áser qaldyrdy. 2025 jyldyń ereksheligi — birneshe megaınvestıtsııalyq kelisimderdiń qatar júzege asýy. Olardyń árqaısysynyń quny $10 mlrd-tan asady, — dedi zertteý avtory Krıstof Nedopıl Van.
Onyń aıtýynsha, Qytaı ekonomıkasyndaǵy ósimniń baıaýlaýy men jahandyq saýda shıelenisiniń artýy qytaılyq kompanııalardy shetel naryqtaryna belsendirek shyǵýǵa ıtermeledi. Al kóptegen el bul bastamaǵa qatysýdy Qytaımen baılanystardy nyǵaıtý múmkindigi retinde qarastyryp otyr.
Esepte 2025 jyly Qytaı ınvestıtsııalarynyń basym bóligi energetıka salasyna baǵyttalǵany aıtylǵan. Investıtsııa kólemi boıynsha kósh bastaǵan aımaqtar: Afrıka — $39 mlrd jáne Ortalyq Azııa — $25 mlrd.
Qazaqstan bastamaǵa qatysýshy elderdiń arasynda kósh bastap, 2025 jyldyń alǵashqy alty aıynda $23 mlrd ınvestıtsııa tartqan. Salystyrý úshin aıta ketsek, Latyn Amerıkasy elderi sońǵy on jyldaǵy eń tómengi ınvestıtsııa men kelisimshart kólemin kórsetken.
Buǵan deıin Qytaı Halyq Respýblıkasynyń Tóraǵasy Sı Tszınpınniń Qazaqstanǵa resmı sapary aıasynda Qazaqstan Energetıka mınıstrligi, Qytaıdyń CNPC korporatsııasy, «QazMunaıGaz» ulttyq kompanııasy» AQ jáne Aqtóbe oblysynyń ákimdigi arasynda karbamıd zaýytynyń qurylysyn kózdeıtin ınvestıtsııalyq jobany iske asyrý jóninde negizdemelik kelisimge qol qoıyldy.