Biri baspanasynan, biri jaqyndarynan aıyrylǵan: Semeıde 228 adam polıtsııaǵa jetkizildi
ASTANA. KAZINFORM — Semeıde jyl basynan beri kóshede qalǵan 228 adam anyqtaldy.
Abaı oblysynyń aýmaǵynda «Qańǵybas» jedel-profılaktıkalyq is-sharasy ótkizilip jatyr.
Oblystyq Polıtsııa departamenti baspasóz qyzmetiniń málimetinshe, onyń maqsaty — qoǵamdyq tártipti qamtamasyz etý ǵana emes, sonymen qatar ómirlik qıyn jaǵdaıǵa tap bolǵan adamdarǵa der kezinde kómek kórsetý.
— Jyl basynan beri Semeı qalasynda polıtsııa bólimshelerine 228 adam jetkizildi. Olardyń 51-i arnaıy qabyldaý ornyna ornalastyrylsa, 177 azamattyń jeke basy anyqtaldy. Ár sannyń artynda — taǵdyry bólek bir adam tur. Biri baspanasynan aıyrylsa, endi biri týǵan-týystarymen baılanysyn joǵaltqan. Al keıbiri alǵash ret óz betinshe eńsere almaıtyn qıyn jaǵdaıǵa tap bolǵan, — deıdi tártip saqshylary.
Polıtsııa qyzmetkerleri qujattary joq azamattardyń jeke basyn anyqtap, qujattaryn qalpyna keltirýge, tirkeýden ótýge, áleýmettik jáne quqyqtyq kómek alýǵa járdemdesedi.
Vedomstvo atap ótkendeı, mundaı jaǵdaıǵa alǵash ret tap bolǵan adamdarǵa erekshe kóńil bólinedi.
— Der kezinde kórsetilgen kómek adamnyń jaqyndarymen qaıta qaýyshyp, ómirin jańadan bastaýyna múmkindik beredi. Alaıda kóshede birneshe ret qalǵan jáne ázirge kómek qabyldaýǵa nemese ómir saltyn ózgertýge daıyn emes adamdar da bar. Mundaı azamattarmen jumys júrgizý ýaqytty, sabyrlylyqty jáne polıtsııa qyzmetkerlerimen qatar áleýmettik qyzmetterdiń de qatysýyn talap etedi. Keıde ózgeriske bastaıtyn alǵashqy qadam — qalpyna keltirilgen qujat, shynaıy áńgime nemese der kezinde sozylǵan kómek qoly bolýy múmkin, — deıdi polıtseıler.
Buǵan deıin Qostanaıda ondaǵan otbasy baspanasyz qalǵanyn jazǵan edik.
