Bir balalar fýtbol alańyn salýǵa qansha qarjy qajet

ASTANA. KAZINFORM – Elimiz boıynsha 1 489 balalar fýtbol alańy jetispeıdi. Bul jaıynda Týrızm jáne sport mınıstrliginen málim etti.

- Jergilikti atqarýshy organdardyń aqparatyna sáıkes, elimiz boıynsha 6 926 balalar fýtbol alańy jumys isteıdi. Onyń ishinde 1 335-i jóndeý jumystaryn júrgizýdi talap etedi. Respýblıka boıynsha jalpy qajettilik – 1 489, jospar boıynsha jergilikti bıýdjetter men jeke ınvestıtsııalar qarajaty esebinen salynatyn balalar fýtbol alańynyń sany – 698, - dedi mınıstrlikten agenttiktiń saýalyna oraı.

Sonymen qatar mınıstrlik bir balalar fýtbol alańyna shamamen qansha qarjy ketetinin atady.

- Bir balalar fýtbol alańynyń quny alańnyń aýdanyna (shaǵyn fýtbol alańynyń mólsheri orta eseppen 40*20 metr, eń tómengi mólsheri 25*15 m, eń joǵary mólsheri 25*42 m), qurylymyna, qorshaýdyń bıiktigine, alańdy jabý materıalyna jáne shyǵystarǵa baılanysty 7 mln teńgeden 20 mln teńgege deıin qarajatty qajet etedi, - dedi vedomstvodan.

Memleket basshysy Qasym-Jomart Toqaev Ulttyq quryltaıdyń tórtinshi otyrysynda aldaǵy eki jylda árbir oblys, aýdan ortalyǵynda, kent pen aýylda balalarǵa arnalǵan fýtbol alańy bolýǵa tıistigin tapsyrǵan edi.

Týrızm jáne sport mınıstrligi osy tapsyrmany oryndaý jónindegi is-sharalar josparyn 2026 jyldyń jeltoqsan aıyn oryndaý merzimimen bekitpek.

Buǵan deıin elimizdiń qaı óńirinde jańa stadıon salynyp, eskileri jańartylatynyn jazǵan edik.