«Bir bala – bir vaýcher»: qosymsha bilim berýde 38 myńnan astam buzýshylyq áshkerelendi
ASTANA. KAZINFORM – Balalarǵa qosymsha bilim berýge arnalǵan memlekettik tapsyrysty ornalastyrýdyń pılottyq jobasy barysynda 38 myńnan astam buzýshylyq pen aýytqý anyqtaldy. Bul týraly Quryltaı depýtattarynyń saýalyna Oqý-aǵartý vıtse-mınıstri Jaıyq Sharabasovtyń jaýabynda aıtylǵan.
- Biryńǵaı tásilderdi, qarjylandyrýdyń ashyqtyǵyn qamtamasyz etý, kórsetiletin qyzmetterdiń sapasy men qoljetimdiligin jaqsartý maqsatynda kórsetiletin qyzmetti alýshylar boıynsha derbestendirilgen qarjylandyrýdy eskere otyryp, «bir bala – bir vaýcher» qaǵıdaty negizinde balalarǵa qosymsha bilim berýge arnalǵan Biryńǵaı memlekettik tapsyrysty (shyǵarmashylyq, sporttyq, bilim berý tapsyrystary) ornalastyrý jónindegi pılottyq joba iske asyryldy, - dedi vıtse-mınıstr.
Onyń málimetinshe, pılottyq joba 2025 jylǵy maýsymnan bastap Atyraý, Qaraǵandy, Qyzylorda, Astana, Aqtóbe jáne Shymkent qalalarynda júzege asyrylyp jatyr. Joba aıasynda Ulttyq bilim berý derekter bazasynyń modýli retinde jumys isteıtin jáne 18 memlekettik aqparattyq júıemen ıntegratsııalanǵan OQU tsıfrlyq platformasy engizildi. Platforma arqyly balalardy kezekke qoıý, ámbebap jáne nysanaly vaýcherler berý, qosymsha bilim berý uıymdaryna qabyldaý, sondaı-aq qarjylyq eseptilikti qalyptastyrý jáne oǵan qol qoıý protsesteri avtomattandyrylǵan.
- Sabaqqa qatysýdy esepke alý derekteriniń anyqtyǵyn arttyrý úshin Qaraǵandy oblysynda QR-skanerleý, Qyzylorda oblysynda Face ID tehnologııasy engizildi. Tsıfrlyq sheshimder esepke alýdyń ashyqtyǵyn qamtamasyz etýge jáne buryn qoldanystaǵy júıelerde tirkelmegen buzýshylyqtardy anyqtaýǵa múmkindik berdi. Pılottyq joba barysynda vaýcherlerdiń qaıtalanýyn, derekterdi aýystyrý jáne jalǵan kontıngent jaǵdaılaryn qosa alǵanda 38 myńnan astam buzýshylyqtar men aýytqýlar anyqtaldy, - dedi Jaıyq Sharabasov.
Vıtse-mınıstr jaýabyna qosymsha berilgen anyqtamaǵan sáıkes:
- qaıtalanatyn vaýcherleri bar 2 650 bala,
- turǵylyqty jerinen tys jerde bilim berý uıymdaryna qabyldanýdyń 1 937 faktisi,
- derbes derekterdi almastyrýdyń 1 241 jaǵdaıy,
- memlekettik derekqorlarda málimetteri joq tulǵalardy qabyldaýdyń 311 faktisi áshkerelendi.
2026 jyly pılottyq óńirlerde Biryńǵaı memlekettik tapsyrys kólemi 88,5 mlrd teńgeni qurady. 2025 jyly bul kórsetkish 132 mlrd teńge bolǵan. Bul rette óńirlerdiń basym bóliginde qarjylandyrýdyń bazalyq normatıvteri aldyńǵy kezeńdegi deńgeıde saqtalǵan. Qosymsha bilim berý baǵyttarynyń sany da turaqty deńgeıde qalyp, qyzmet kórsetýshiler sany 1 670 uıymdy qurady. Pılottyq jobany iske asyrý úshin jergilikti atqarýshy organdar 2026 jylǵa 773 240 vaýcher qarastyrǵan. Onyń 140 091-i - ámbebap, 633 149-y - nysanaly vaýcher.
- Sáıkestendirý jáne sabaqqa qatysýdy esepke alý júıesin baqylaý sapasyn arttyrý maqsatynda qajetti tehnologııalar 1 670 uıymǵa engizildi. Olardyń ishinde Face ID, QR-kodtaý jáne Alaqan ID tehnologııalary keńinen qoldanylady. Pılottyq jobanyń aldyn ala nátıjeleri shyǵarmashylyq, sporttyq jáne bilim berý baǵyttaryndaǵy memlekettik tapsyrystardy biryńǵaı tsıfrlyq júıege biriktirý, ınfraqurylymdy belgilengen talaptarǵa sáıkestendirý, derbestendirilgen qarjylandyrýdy engizý jáne biryńǵaı kezek qalyptastyrý qosymsha bilim berýdiń qoldanystaǵy modelindegi negizgi júıelik problemalardy sheshýge múmkindik beretinin kórsetti. Pılottyq joba bastamany odan ári keńeıtýge negiz boldy, - dedi vıtse-mınıstr.
Buǵan deıin Oqý-aǵartý mınıstrligi balalardy qosymsha bilimmen qamtý kórsetkishiniń tómendeýine ne sebep bolǵanyn ataǵan edi.
