Bir aıda Ózbekstan Qazaqstannan 240 mln dollardyń taýaryn ımporttaǵan

TAShKENT. KAZINFORM — Bıyl qańtarda Qazaqstan men Ózbekstan arasyndaǵy taýar aınalymy 300 mln dollardan asty, dep habarlaıdy Kazinform agenttiginiń menshikti tilshisi.

Ózbekstan Statıstıka agenttiginiń aqparatyna saı, qańtarda eldiń syrtqy saýda aınalymy $4,5 mlrd dollarǵa jetip, byltyrǵy kezeńmen salystyrǵanda 7,1%-ǵa ósti.

Qańtar aıynyń qorytyndysy boıynsha eldiń basty saýda seriktesteri kóshin Qytaı bastap tur. Eki memleket arasyndaǵy taýar aınalymy 994 mln dollardan (jalpy kólemniń 22,1%) asty.

Odan keıingi orynda saýda-sattyqtyń 17,7% úlesi tıesili Reseı tur. Bul elmen aradaǵy ımport-eksport kólemi 799,1 mln dollar boldy.

Sonymen qatar, kóshbasshylardyń úshtigin Qazaqstan túıindedi. Bizdiń el men Ózbekstan arasyndaǵy taýar aınalymy 313,5 mln dollar (6,5%). Bul 2024 jyldyń sáıkes kezeńimen salystyrǵanda 42,6 mln dollarǵa kóp.

Qamtylyp otyrǵan kezeńde Ózbekstan Qazaqstanǵa 72,9 mln dollardyń taýaryn eksporttap, 240,6 mln dollardan astam somaǵa taýar ımporttaǵan.

Eske salaıyq, byltyr Qazaqstan men Ózbekstan arasyndaǵy taýar aınalymy 4,2 mlrd dollardan asty. Osy oraıda resmı Astana men Tashkent ózara alys-beris kólemin 10 mlrd dollarǵa jetkizýge múddeli.

Buǵan deıin habarlaǵanymyzdaı, byltyr Qazaqstannan Ózbekstanǵa 800 mln dollarǵa jýyq aqsha aýdarylǵan.

Sondaı-aq, Ózbekstanda qazaqstandyq kapıtalmen myńnan astam kásiporyn jumys isteıdi.