Bir aıda myńnan astam qazaqstandyq Ózbekstanǵa emdelý úshin barǵan

TAShKENT. KAZINFORM – Ótken aıda em alý maqsatynda Ózbekstanǵa 7 myńnan astam sheteldik kelgen, dep habarlaıdy Kazinform agenttiginiń Tashkenttegi menshikti tilshisi.

Ózbekstannyń Statıstıka agenttiginen málim etkendeı, medıtsınalyq qyzmetter alý úshin atalǵan memleketke eń kóp kelgender – Tájikstan azamattary (4,8 myń adam).

Odan keıin qazaqstandyqtardyń úlesi basym. Bıyl qańtarda dertine daýa izdegen 1 080 Qazaqstan azamaty Ózbekstanǵa barǵan.

Kelesi oryndarda Qyrǵyzstan (959 adam), Reseı (120 adam) jáne Túrikmenstan (66 adam) tur.

Aıta keteıik, byltyr Ózbekstanǵa jalpy sany 6,6 mln sheteldik kelse, sonyń 61 myńnan astamy osynda emdelýdi josparlaǵandar.

Odan bólek, 2023 jyly 1,2 mln qazaqstandyq Ózbekstanǵa týysqandarymen kórisý úshin barǵan.