Bir aıda Qazaqstan men Ózbekstan arasyndaǵy taýar aınalymy 400 mln dollardan asty

TAShKENT. KAZINFORM – Qańtar aıynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń Tashkenttegi menshikti tilshisi. 

Ózbekstan Ulttyq statıstıka komıtetiniń aqparatyna saı, qańtarda eldiń syrtqy saýda aınalymy 5,8 mlrd dollarǵa jetip, 2025 jyldyń sáıkes kezeńimen salystyrǵanda 29,2%-ǵa ósti. Bir aıda kórshiles memleket álemniń 145 elimen saýda-sattyq jasady.

Ózbekstannyń negizgi saýda seriktesteri kóshin Qytaı bastap tur. Eki memleket arasyndaǵy taýar aınalymy 1,6 mlrd dollardan (jalpy kólemniń 27,9%-y) asty.

Al saýda-sattyqtyń 18,7%-y Reseıdiń úlesine tıesili. Bul elmen aradaǵy eksport-ımport kólemi 1 mlrd dollardan artyq.

Sondaı-aq, kóshbasshylardyń úshtigin Qazaqstan túıindeıdi. Resmı Astana men Tashkent arasyndaǵy taýar aınalymy 414 mln dollardan (7,1%) asty. Bul 2025 jyldyń sáıkes kezeńimen salystyrǵanda 100 mln dollarǵa kóp.

Qamtylyp otyrǵan kezeńde Ózbekstan 81,6 mln dollardyń taýaryn eksporttap, 332 mln dollardan astam somaǵa ónim ımporttaǵan.

Eske salaıyq, byltyr Qazaqstan men Ózbekstan arasyndaǵy taýar aınalymy 5 mlrd dollarǵa jýyqtaǵan edi.

Taıaýda habarlaǵanymyzdaı, Ózbekstanda qazaqstandyq kapıtalmen jumys isteıtin kompanııalar qatary kóbeıdi.

Sondaı-aq, Qazaqstanda tirkelgen kólikterdiń Ózbekstanda júrý merzimi 6 aıǵa deıin uzartylýy múmkin.

Qosa ketsek, taıaýda Ózbekstan Memlekettik keden komıtetiniń Strategııalyq josparlaý jáne kedendik rásimderdi ońtaılandyrý basqarmasynyń bastyǵy Farhod Olımjonov Kazinform agenttigine suhbat berip, saıahatshylar qaperde ustaýy tıis erejelerdi aıtqan edi.