Bir aıda 100-den asa dron: Desanttyq-shabýyldaý áskerlerinde óndiris damyp keledi
ASTANA. KAZINFORM — Qazaqstannyń Desanttyq-shabýyldaý áskerlerinde ushqyshsyz avıatsııalyq júıelerdi damytý baǵytynda turaqty ilgerileý baıqalady, dep habarlaıdy Qorǵanys mınıstrliginiń baspasóz qyzmeti.
Búginde drondardy jınaqtaý, baptaý, synaqtan ótkizý jáne olardy ásker bólimderine tapsyrýdyń tolyq tsıkli jolǵa qoıylǵan. Ushqyshsyz avıatsııalyq júıeler bólimsheleri Desanttyq-shabýyldaý áskerleri quramynda eki jyl buryn qurylǵan.
— Osy ýaqyt ishinde áskerı qyzmetshiler drondardy praktıkalyq qoldanýdy meńgerip qana qoımaı, olardy óz kúshimen jınaqtaý men jóndeý jumystaryn da jolǵa qoıdy. Bul áskerdiń ishki qajettilikteriniń edáýir bóligin óz betimen qamtamasyz etýge múmkindik berdi. Drondardy jasaý, jınaý jáne jóndeý sheberhanasy 2025 jyldyń jeltoqsanynda jumysyn bastady. Onda arnaıy daıyndyqtan ótken kelisimshart negizindegi áskerı qyzmetshiler qyzmet etedi. Jaqynda munda júzinshi ushqyshsyz ushý apparaty qurastyryldy, — delingen habarlamada.
Barlyq dron mindetti túrde baqylaý synaqtarynan ótkizilip, keıin áskerı bólimderge tapsyrylady. Mamandardyń aıtýynsha, bul baǵytty damytý qazirgi zamanǵy soǵys júrgizý talaptarynan týyndap otyr. Qazirgi qarýly qaqtyǵystardy taldaý ushqyshsyz apparattardyń barlaý, atysty túzetý jáne bólimshelerdi basqarýdaǵy róliniń artqanyn kórsetedi.
Bıyl Desanttyq-shabýyldaý áskerleriniń oqý ortalyǵy bazasynda UUA operatorlaryn daıarlaý bastalady. Oqytýdy arnaıy kýrstardan ótken, ártúrli úlgidegi drondardy qoldaný tájirıbesi bar nusqaýshylar júrgizedi. Ushqyshsyz avıatsııalyq júıeler bólimsheleri «Desant-2025» oqý-jattyǵýlary barysynda alǵashqy «jaýyngerlik synaqtan» ótti. Olar áýe barlaýyn júrgizip, avıatsııa men artıllerııanyń atysyn túzetti, soqqy berýge qatysyp, bólimshelerdi naqty ýaqyt rejıminde basqarýdy qamtamasyz etti.
Qazir Desanttyq-shabýyldaý áskerleriniń qarý-jaraǵynda otandyq jáne sheteldik óndiristegi taktıkalyq ushqyshsyz avıatsııalyq júıeler bar. Bul baǵytty odan ári damytý, jańǵyrtý jáne jetildirý jumystary josparly túrde jalǵasyp keledi.
Osydan buryn qazaqstandyq saperler Golan jotasynda 1200-den asa jarylǵysh zatty joıǵanyn jazdyq.