Bir aı ishinde dúkennen 13 ret ishimdik urlaǵan jigit ustaldy
Bir aı ishinde dúkennen 13 ret ishimdik urlaǵan Hromtaý turǵyny ustaldy. Kazinform bul týraly Polisia.kz-ke silteme jasap habarlaıdy.
29 jastaǵy jigit bir aı ishinde Hromtaý qalasynda ornalasqan sýpermarketterdiń birine 13 ret kelip, árqaısysynda 1 bótelke alkogol ónimin jasyryn jymqyryp otyrǵan. Dúken sóresine qoıylǵan bótelkelerdiń ishinde ony quny 8 myń jáne 9 myń teńge turatyn vıskı ónimderi ǵana qyzyqtyrǵan.
Qarasha aıynyń basynda sýpermarketke kelgen azamat sóreden 1 bótelke alkogol ónimin alyp, kúrtesiniń ishine salyp jasyryn alyp shyqqan. Muny eshkimniń baıqamaǵanyn bilgennen keıin ol erteńine dál sol jerge taǵy kelip, osy zańsyz áreketin qaıtalaǵan. Osydan keıin jigit muny ádetke aınaldyrǵan. Tipti bir kúnde eki ret: túske deıin jáne tústen keıin kelip, árqaısysynda 0,5 nemese 0,7 lıtrlik bir bótelke vıskıdi tegin áketip otyrǵan.
Bul týraly polıtsııaǵa jeltoqsan aıynyń basynda 43 jastaǵy kásipker aryzdandy. Urlanǵan alkogol ónimderiniń saldarynan kásipkerge keltirilgen shyǵynnyń jalpy kólemi 100 myń teńgeden asty. Jedel-izdestirý sharalaryn júrgizý jáne beınekameralardyń jazbalaryn zerdeleý barysynda polıtseıler hromtaýlyq jigitti anyqtap, ustady. Ol urlaǵan alkogoldik ónimderdiń barlyǵyn iship taýysqanyn jetkizdi.
Bul derek boıynsha Qazaqstan Respýblıkasy Qylmystyq kodeksiniń 187-babymen qozǵalǵan qylmystyq is sheńberinde tergep-tekserý júrgizilip jatyr.
