Qyzylordadaǵy jol apatynan zardap shekken áıeldiń týystary kúdiktiniń bir aıdan beri tabylmaı otyrǵanyna narazy
QYZYLORDA. KAZINFORM –Qyzylordada jol apatynyń saldarynan sábıinen aıyrylǵan áıeldiń týystary kúdiktiniń tabylmaǵanyna alańdap, istiń ádil tergelýin talap etti.
Eske salaıyq, bıyl 13 qazan kúni Qyzylorda qalasynyń Qultekenov kóshesinde kelinshekti arbadaǵy sábıimen birge avtokólik qaǵyp ketken.
- Sol qaıǵyly oqıǵada beıkúná sábıden aıyryldyq, al sińilim aýyr jaraqat alyp, uzaq ýaqyt ómir men ólim arasynda jatty. Ol áli de aýyr jaǵdaıdan keıingi em-domyn jalǵastyryp keledi. Arada bir aı ýaqyt ótti, biraq osy oqıǵaǵa qatysty kúdikti áli kúnge deıin ustalǵan joq. Biz Qyzylorda oblystyq Polıtsııa departamentine birneshe ret aryzdandyq, Іshki ister mınıstrligine de júgindik. Alaıda, 3 qarashadaǵy resmı jaýapta tek aryzdarymyzdyń bir qylmystyq iske biriktirilgeni jáne tergeý áreketteri júrgizilip jatqany ǵana jazylǵan. Al bizdiń negizgi suraqtarymyzǵa naqty jaýap joq, - dedi jábirlenýshiniń týysy.
Jábirlenýshiniń týystary kúdiktini izdestirý jumystaryn kúsheıtip, onyń ornalasqan jerin anyqtaý úshin barlyq qajetti jedel-izdestirý sharasyn qabyldaýdy talap etip otyr. Qala aýmaǵyndaǵy beınebaqylaý kameralarynyń jazbalaryn tolyq tekserip, kúdiktiniń ne sebepti uzaq ýaqyt boıy ustalmaǵanyna túsinikteme berýdi suraıdy.
Sonymen qatar Bas prokýratýra men Іshki ister mınıstrliginen qylmystyq isti tikeleı baqylaýyna alýdy talap etti. Jábirlenýshi tarapqa tergeý barysy men izdestirý nátıjeleri týraly tolyq ári naqty aqparat berilýin qalaıdy. Basty talaptary – istiń ádil ári jan-jaqty tergelýi, kúdiktiniń tabylyp, zań aıasynda jaýapqa tartylýy.
Rasymen, bir aıdan beri izdestirý jumysy nátıje bermedi.
- Jol-kólik oqıǵasy boıynsha kúdiktige izdeý jarııalandy. Tergeý soty kúdiktini qamaýǵa alý sharasyna sanktsııalady. Kúdiktiniń júrgen jerin anyqtaý maqsatynda oblystyq polıtsııa departamentiniń jeke quramyna baǵdar berildi. Barlyq kúsh pen qural jumyldyryldy, - delingen departament habarlamasynda.
Polıtsııa tergeý barysy erekshe baqylaýda ekenin eske saldy.
Buǵan deıin polıtsııa kúdiktiniń aty-jónin jarııalady. Ol 2000 jyly týǵan Alekseı Velıkov ekeni anyqtaldy.
Al jergilikti zań kompanııasy adam ólimine ákep soqqan jol-kólik oqıǵasy boıynsha kúdiktini tabýǵa kómektesken adamǵa qarjylaı syıaqy taǵaıyndady.