Mektepter bir aýysymdy oqytý júıesine qadam basty – Oqý-aǵartý mınıstri

ASTANA. KAZINFORM – Oqýshylarymyzdyń halyqaralyq jarystardan júldeli orala bastaýy – memleket tarapynan kórsetilip jatqan úlken qoldaýdyń nátıjesi. Bul týraly BIZDIÑ ORTA podkasynda Oqý-aǵartý mınıstri Ǵanı Beısembaev aıtty.

– Úsh aýysymdy mektep máselesin bıyl túbegeıli sheshemiz dep otyrmyz. Máselen, keshe Túrkistan oblysynyń ákimdigimen sóıleskenimde olar: «70 jyldyq tarıhta óńirdegi úsh aýysymdy mektepter joıylady dep kútpep edik. Ulttyq joba óńirimizdegi osy máseleni túbegeıli sheshýge yqpal etip otyr. Bizde 2-3 mektep qana qaldy. Ony da bıyl sheshemiz, - deıdi. Tipti, biz úsh aýysymdy mektepten bir aýysymdy mektepterge de kóship jatyrmyz. Qazirdiń ózinde elimizde 3 myńnan asa bir aýysymda oqyp jatqan mektepter bar. Astana qalasynyń ózinde bir aýysymdy mektepter bar. Jalpy, biz bir aýysymdy mektepterge qaraı qadam bastadyq. Bul balalardyń túske deıin bilim alyp, tústen keıin qosymsha bilimmen aınalysýyna úlken múmkindik týǵyzyp jatyr. Muny balalardyń sapaly bilim alýyna jáne tulǵa, azamat bolyp qalyptasýyna yqpal etetin sheshimder dep esepteımin, - dedi Ǵanı Beısembaev.

Mınıstrdiń aıtýynsha, memlekettiń bilim salasyna quıyp jatqan qarjylaı jáne basqa da kómekteri óz nátıjesin bere bastady.

– Bir aýysymǵa kóshý jáne balalarymyzdyń túrli halyqaralyq jarystardan júldeli oryndarmen kele bastaýy – bul bilim salasyna sońǵy 6 jylda memleket tarapynan kórsetilip jatqan úlken qoldaýdyń nátıjesi, - dedi ol.

Eske salsaq, buǵan deıin Oqý-aǵartý mınıstri Ǵanı Beısembaev elimizdegi barlyq bilim ordasy zamanaýı «Keleshek mektepterine» aınalatynyn aıtqan edi.