Bir aptadan soń kelesi Paralımpıadaǵa daıyndyqty bastaımyn – Dastan Muqashbekov
ASTANA. KAZINFORM – ıAdro laqtyrýdan XVII jazǵy Paralımpıada oıyndarynyń qola júldegeri Dastan Muqashbekov Parıjden elge oraldy.
Paralımpıada jeńimpazyn elorda áýejaıynan jaqyndary, áriptesteri, sportshylar, jattyqtyrýshylar men BAQ ókilderi qarsy aldy.
Dastan Muqashbekov ushaqtan ulttyq shapan kıip shyqty. Ol shapan kııýdi ıadro laqtyrýdan ótken álem chempıonatynan keıin dástúrge aınaldyrǵan.
«Meni qoldaǵan barsha jankúıerge raqmet. Ata-anama, jubaıyma, balalaryma erekshe alǵys aıtamyn. Qarsylastarym óte myqty, bári de Paralımpıada, álem chempıondary. Bir aptadan soń kelesi Paralımpıadaǵa daıyndyqty bastaımyn. Alda jeńil atletıkadan Qazaqstan chempıonaty bolady, soǵan qatysqym keledi», - dep bólisti Dastan Muqashbekov.
Sondaı-aq ol bul jeńisin barsha qazaqstandyqqa arnaıtynyn aıtty.
Aıta keteıik, Dastan Muqashbekov XVII jazǵy Paralımpıada oıyndarynda ıadro laqtyrýdan qola júldeger atandy. Sportshy ıadrony 16 metrge laqtyryp, Azııa qurlyǵynyń jańa rekordyn ornatty. Bul – qaraǵandylyq sportshynyń Paralımpıada oıyndaryndaǵy alǵashqy júldesi.