Bir aptada «Semeı ormanynda» 15 órt oshaǵy anyqtalyp, der kezinde joıyldy
ASTANA. KAZINFORM — «Semeı ormany» memlekettik orman tabıǵı rezervatynda bir apta ishinde 15 orman órti tirkeldi. Jalpy aýmaǵy 0,4 gektardy quraǵan órtterdiń barlyǵy rezervat qyzmetkerleri men «Qazavıaormanqorǵaý» mamandarynyń úılesimdi jumysynyń nátıjesinde tolyqtaı sóndirildi. Bul týraly Orman sharýashylyǵy jáne janýarlar dúnıesi komıteti málim etti.
Tabıǵatty saqtaý jolyndaǵy mańyzdy mindetterdiń biri – orman órtteriniń aldyn alý jáne olardy der kezinde sóndirý.
– Bıyl 15–21 maýsym aralyǵynda “Semeı ormany” memlekettik orman tabıǵı rezervatynyń aýmaǵynda 15 orman órti tirkelip, olardyń jalpy aýmaǵy 0,4 ga qurady. Barlyq órt oshaqtary jedel anyqtalyp, oqshaýlanyp, tolyqtaı sóndirildi, – delingen komıtettiń habarlamasynda.
Bul – táýlik boıy elimizdiń orman qoryn kúzetip júrgen rezervat qyzmetkerleri men «Qazavıaormanqorǵaý» mamandarynyń kásibı ári úılesimdi jumysynyń nátıjesi.
Orman sharýashylyǵy jáne janýarlar dúnıesi komıteti órt qaýpi joǵary kezeńde tabıǵat aıasynda demalý kezinde qaýipsizdik erejelerin saqtaýdy eskertti.
Kelesi nusqaýlyqty qatań ustanýǵa shaqyrdy:
- Ot jaqpańyz;
- Temeki tuqylyn tastamańyz;
- Qoqys qaldyrmańyz;
- Tabıǵatqa uqypty qarańyz.
Aıta keteıik, byltyr 62,7 myń gektardy sharpyǵan 609 orman órti tirkeldi.
