Bir aptada Qazaqstanda qandaı jańa nysandar ashyldy
ASTANA. KAZINFORM — Bir aptada elde jańa mektep, saıabaq pen tsıfrlyq keńse paıdalanýǵa berildi, dep habarlaıdy Úkimettiń baspasóz qyzmeti.
Memleket basshysy Qasym-Jomart Toqaevtyń tapsyrmalaryn júzege asyrý maqsatynda elimizdiń óńirlerinde kólik, ınjenerlik jáne áleýmettik ınfraqurylymdardy, onyń ishinde turǵyn úı ınfraqurylymyn jańǵyrtý jumystary júrgizilip jatyr.
Qurylysy bastaldy
Býrabaı kýrorttyq aımaǵynda «Halyqtyq qurylys» baǵdarlamasy aıasynda aýdany 12,8 myń sharshy metr bolatyn halyqaralyq deńgeıdegi kópfýnktsıonaldy kongress-ortalyqtyń qurylysy bastaldy. Joba iskerlik týrızmdi damytýǵa, maýsymaralyq kezeńde qonaqtar aǵynyn arttyrýǵa jáne óńirlik ekonomıkany qoldaýǵa baǵyttalǵan. Ony júzege asyrý shaǵyn jáne orta bıznestiń, qyzmet kórsetý salasynyń, qoǵamdyq tamaqtaný men kólik ınfraqurylymynyń damýyna serpin beredi. Bul – jańa jumys oryndary, qosymsha ınvestıtsııalar jáne jergilikti kásipkerler úshin ashylǵan múmkindikter.
Paıdalanýǵa berildi
Jańartylǵan temirjol vokzaldary, bilim berý nysandary paıdalanýǵa berildi, aýyldardy gazdandyrý jáne azamattardyń áleýmettik osal sanattary arasynda turǵyn úı qoryn bólý boıynsha jumystar júrgizildi.
Bilim berý jáne abattandyrý
Kókshetaýda 120 oqýshyǵa arnalǵan mektep ashyldy, ol apatty ǵımarattyń ornyna salynǵan. Bilim ordasynda oqýshylar úshin jaıly jáne tolyqqandy oqý úderisi úshin zamanaýı jaǵdaılar jasalǵan: 11 oqý kabıneti, sheberhanalar, kitaphana, medblok, akt jáne sport zaldary jabdyqtalǵan.
Aqmola oblysynda aýdany 33,7 myń sharshy metr bolatyn mádenıet jáne demalys saıabaǵy ashyldy. Makınsk qalasyndaǵy saıabaq aýmaǵynda ártúrli jastaǵy toptarǵa arnalǵan balalar jáne sport alańdary, júgirý joly, áńgime-dúken qurýǵa arnalǵan kúrkeler, átkenshekter jáne mádenı-buqaralyq is-sharalardy ótkizetin amfıteatr bar.
Kólik ınfraqurylymy
Jetisý oblysynda Jaıpaq jáne Saryózek temirjol stansalaryn rekonstrýktsııalaý aıaqtaldy. Infraqurylymdar jańartylyp, qaýipsizdik talaptary kúsheıtildi jáne jolaýshylar úshin jaǵdaılar jaqsara tústi. Bul jumystar Prezıdent bastamashylyq etken 124 vokzaldy jańǵyrtý baǵdarlamasy aıasynda júrgizilgen.
Injenerlik ınfraqurylym
Jetisý oblysynda tórt eldi meken – Áýlıeaǵash, Aqjazyq, Aqqudyq jáne Sholaqaı aýyldary tabıǵı gazǵa qosyldy. Buryn kómir men aǵash jaǵyp kelgen 9 myńǵa jýyq aýyl turǵyny kógildir otynǵa qol jetkizdi. Búgingi tańda elimiz boıynsha gazdandyrý deńgeıi 64,2%-ǵa jetti, ıaǵnı, 13,1 mln adam tabıǵı gazdyń ıgiligin kórip otyr. 2035 jylǵa qaraı bul kórsetkishti 80%-ǵa deıin jetkizý josparlanýda.
Tsıfrlyq ınfraqurylym
Qaraǵandyda JI servısteri ıntegratsııalanǵan memlekettik qyzmetter kórsetetin jańa formattaǵy tsıfrlyq AI-keńse ashyldy. Onyń dástúrli HQKO-lardan aıyrmashylyǵy: ortalyqta qujattardy rásimdeý azamattardyń tsıfrlyq saýattylyq daǵdylaryn arttyrýǵa baǵyttalǵan, olar elektrondyq portaldardy óz betinshe paıdalana alýy úshin tegin oqytylady.
Turǵyn úı qory
Elimizdiń óńirlerinde áleýmettik osal sanattaǵy, kezekte turǵan azamattardyń jáne kóp balaly otbasylardyń arasynda turǵyn úı bólý jalǵasýda. Shymkentte, sondaı-aq Almaty, Aqmola jáne Túrkistan oblystarynda otbasylar 136 páter men turǵyn úıdiń kiltin aldy.
Tótenshe jaǵdaılar qyzmetkerleriniń birneshe otbasy Almatydaǵy «Qutqarýshylar úıi» jańa turǵyn úı kesheninen qyzmettik páter kiltterin aldy. Jańa ǵımarat órt sóndirý bóliminiń janynda ornalasqan. Turǵyn úı jıhazben, turmystyq tehnıkamen tolyq jabdyqtalǵan jáne qonystanýǵa daıyn.
Osydan buryn Ystanbulda Qazaqstannyń saýda keńsesi ashylǵanyn jazdyq.
