Bir aptada AQSh-ta qatty sýyqtan 83 adam qaza tapty

ASTANA. KAZINFORM – Sınoptıkter aldaǵy kúnderi AQSh-tyń úshten eki bóliginde temperatýra aıtarlyqtaı tómendep, qar aralas nóser jaýatynyn boljady. CBS News sońǵy aptada AQSh-ta aýa raıyna baılanysty 83 adam ólimi tirkelgenin habarlady, dep habarlaıdy Kazinform Amerıka daýysyna silteme jasap. 

Ulttyq aýa raıy qyzmeti (NWS) senbide sońǵy kúnderi AQSh-tyń kóp bóligin qamtyǵan qysqy daýyl men aıaz kelesi aptanyń sońyna deıin saqtalýy múmkin dep málimdedi.

Tennessıde 19 adam aýa raıynyń qolaısyzdyǵynan, al Oregon shtatynda 16 adam qaıtys boldy. CBS habarlaýynsha, qalǵan adam ólimi basqa segiz shtatta, sonyń ishinde Illınoıs, Pensılvanııa, Mıssısıpı, Vashıngton, Kentýkkı, Nıý-Iork jáne Nıý-Djersıde bolǵan.

Sońǵy aptada Tynyq muhıtynyń soltústik-batysy men eldiń ońtústik aımaǵynyń bólikteri qatty qysqy aýa raıynan zardap shekti. Bul aımaqtarda jylýǵa rekordtyq kólemde tabıǵı gaz ben elektr qýaty paıdalanylǵan.

Senbi kúni Parsy shyǵanaǵy boıyndaǵy keń aýmaqta, Tehas pen Lýızıananyń shyǵysynan Mıssısıpıdiń, Alabamanyń kóp bóligine jáne Florıda men Djordjııanyń keıbir bólikterinde qatty aıaz boldy.

Jeksenbi kúni keshke deıin Uly kólderdiń ońtústiginde jáne ortalyq Appalachııa men soltústik-shyǵys aýdandarynda qar jaýady.

Sonymen birge Tynyq muhıtynyń soltústik-batysynyń kóp bóliginde aıaz bolyp, jańbyr jaýady dep kútilýde. Serra-Nevada taýlarynda qar jaýyp, Kalıfornııanyń soltústiginde tómengi bıiktikte qatty jańbyr jaýyp, sý tasqyny bolýy múmkin. Nóser Ońtústik Kalıfornııaǵa da jetedi begen boljam bar.