Bir aptada 20 myń almatylyq JRVI-men aýyrdy
Almatyda jedel respıratorlyq vırýstyq ınfektsııa juqtyrǵandar boıynsha epıdemıologııalyq ahýal qalypty. Bul týraly qalanyń Sanıtarııa-epıdemıologııalyq baqylaý departamenti jetekshisi Qasymhan Alpysbaıuly málim etti, dep habarlaıdy Kazinform.
Bas sanıtarııa dárigeri ótken aptada JRVI juqtyrǵan 20 134 adam tirkelgenin, 100 myń turǵynǵa shaqqandaǵy aýrý kórsetkishi 903,03 bolǵanyn málimdedi. Bul – byltyrǵy jyldyń osy kezeńimen salystyrǵanda 37%-ǵa tómen.
– Jańa epıdemıologııalyq maýsym bastalǵaly zerthanada rastalǵan tumaý tirkelgen joq. Qalada JRVI-diń tumaýǵa jatpaıtyn basqa túrleri - rınovırýs, bokavırýs, RS vırýs, adenovırýs, paratumaý men maýsymdyq koronavırýs tarap jatyr, - dep atap ótti Qasymhan Alpysbaıuly.
Onyń sózinshe, bıyl jergilikti bıýdjet esebinen qaýip tobyndaǵy azamattarǵa vaktsına egý úshin reseılik «Grıppol plıýs» úsh valentti 250 myń vaktsınasy satyp alyndy. Qalada aldyn alý maqsatynda 25 qyrkúıekten bastap qaýip tobyndaǵy tulǵalardy vaktsınalaý júrip jatyr. Jekemenshik medıtsına ortalyqtarynda tumaýǵa qarsy ekpe alǵysy kelgender, onyń ishinde túrli sala qyzmetkerlerin jumys berýshiler esebinen aqyly túrde vaktsınalaý múmkindigi bar.
2 qarashadaǵy jaǵdaı boıynsha tumaýǵa qarsy 205 033 adam vaktsına aldy, onyń ishinde 201 696 azamat (80,7%) qaýip tobyna jatady. 2 493 turǵyn jumys berýshi esebinen vaktsınalansa, 844 adam jekemenshik medıtsına ortalyqtarynda óz qarjysyna ekpe qabyldady. Tumaýǵa qarsy vaktsınalaý qarashanyń sońyna deıin jalǵasady.
Sanıtarııa dárigeri vaktsınatsııa turǵyndardy tumaý vırýsyn juqtyryp alýdan qorǵap qana qoımaı, asqynyp ketý qaýpi men ólim jaǵdaıyn azaıtýǵa aıtarlyqtaı kómektesetinin aıtty.
