Bir aptada 12 orman órti: Qazaqstanda órt qaýpi joǵary bolyp tur
ASTANA. KAZINFORM — 31 tamyz ben 6 qyrkúıek aralyǵynda Qazaqstannyń memlekettik orman qory aýmaǵynda 12 orman órti tirkeldi. Órtterdiń basym bóligi jedel oqshaýlanyp, sóndirildi. Bul týraly Ekologııa jáne tabıǵı resýrstar mınıstrligi málim etti.
Esepti kezeńde memlekettik orman kúzetiniń qyzmetkerleri men «Qazavıaormanqorǵaý» RMQK-nyń áýe órt sóndirý desanttary, avıatsııalyq jáne arnaıy tehnıkalary 11 orman órtin sóndirýge, sondaı-aq orman alqaptaryna qaýip tóndirgen iri kólemdegi dala órtterin sóndirý jumystaryna tartyldy.
Tirkelgen órtterdiń ishinde:
- jergilikti atqarýshy organdarǵa qarasty orman mekemelerinde – 10 órt;
- memlekettik orman qorynyń basqa aýmaqtarynda – 2 órt.
Mınıstrliktiń dereginshe, órt oshaqtary «Qazavıaormanqorǵaý» RMQK júrgizgen áýe patrýldeýi, erte anyqtaý júıeleri jáne memlekettik orman kúzetiniń jerústi baqylaýy arqyly der kezinde anyqtalǵan. Jedel túrde qajetti kúshter men tehnıkalar jumyldyrylyp, órtterdiń qysqa merzim ishinde oqshaýlanyp, tolyq sóndirilýi qamtamasyz etilgen.
Qazirgi ýaqytta Marqakól memlekettik tabıǵı qoryǵynyń jáne Almaty oblysynyń aýmaǵynda órtti sóndirý jumystary júrgizilýde. Órtti tolyq sóndirýge jáne onyń odan ári taralýyna jol bermeýge baǵyttalǵan tıisti jumystar jalǵasyp jatyr.
Memlekettik orman kúzeti men «Qazavıaormanqorǵaý» RMQK qyzmetkerleriniń birlesken jáne úılesimdi jumysynyń arqasynda órtterdiń odan ári taralýyna jáne úlken aýmaqtardy qamtýyna jol berilmedi.
Sonymen qatar, elimizdiń birqatar óńirlerinde joǵary temperatýra men naızaǵaıly fronttardyń saqtalýyna baılanysty orman órtteriniń shyǵý qaýpi joǵary deńgeıde qalyp otyr.
Osyǵan baılanysty azamattardy, tabıǵat aıasynda demalýshylardy jáne orman paıdalanýshylardy órt qaýipsizdigi talaptaryn qatań saqtaýǵa, otty abaılap paıdalanýǵa jáne tabıǵı aýmaqtarda qaýipsizdik sharalaryn saqtaýǵa shaqyramyz.
Aıta keteıik, buǵan deıin Marqakóldegi órtti sóndirýge 83 adam jáne 2 tikushaq jumyldyrylǵanyn jazdyq.
