Biri aman, ekinshisi qaza tapty: Túrkistan oblysynda taýda adasqan eki azamat tabyldy
TÚRKІSTAN. KAZINFROM — Tiri qalǵan azamat atpen taýdyń etegine túsirilip, týystaryna tabystaldy. Al qaıtys bolǵan ekinshi adamnyń denesi polıtsııa qyzmetkerlerine berildi.
1 qyrkúıek kúni «112» pýltine Shymkentten habarlama túsken. Onda 31 tamyz kúni taýǵa shyqqan 1996 jáne 1997 jyly týǵan eki jas jigittiń joǵalyp ketkeni aıtylǵan. Tótenshe jaǵdaı qyzmeti shaqyrtý túsken boıda dereý izdestirý-qutqarý jumystaryna kirisken.
— Qutqarý operatsııasy teńiz deńgeıinen 2200 metr bıiktikte, Saıramsý shyńy mańynda, «Saıram-Ógem» ulttyq tabıǵı parkiniń aýmaǵynda júrgizildi. Qasqasý aýylynan 8 shaqyrym jerde ornalasqan bul aımaq relefiniń kúrdeliligimen jáne qaterli jartastarymen belgili. Sol sebepti izdeý jumystary qutqarýshylar úshin ońaıǵa túsken joq, — delingen Túrkistan oblysy Tótenshe jaǵdaılar departamenti taratqan aqparatta.
Operatsııa barysynda «Іzgi nıet» asýy mańynda qutqarýshylar joǵalǵan týrısterdiń birimen baılanys ornata alǵan. Ol ekinshi azamattyń 1996 jyly týǵan Ózbekstan Respýblıkasynyń azamaty ekenin aıtqan. Alaıda jartasty ári bıik taý shatqaldaryna tikushaq jaqyndaı almaı, qutqarý toby jaıaý izdeýdi jalǵastyrýǵa májbúr boldy.
Jaǵdaıdyń qıyndyǵyna qaramastan, arnaıy kómekke Qazaqstan alpınızm federatsııasynyń bes kásibı alpınısi jumyldyryldy. Olar qutqarýshylarmen birge jartastarǵa kóterilip, izdestirýdi jalǵastyrdy. Nátıjesinde tiri qalǵan bir týrıst tabylyp, qaıtys bolǵan adamnyń denesi de anyqtaldy.
— Tiri qalǵan azamat atpen taýdyń etegine túsirilip, týystaryna tabystaldy. Al marqumnyń denesi polıtsııa qyzmetkerlerine berildi. Bul qutqarý operatsııasyna Tótenshe jaǵdaılar mınıstrliginiń 18 qyzmetkeri men 5 tehnıkasy, orman sharýashylyǵy mamandary, polıtsııa qyzmetkerleri, alpınıster, sondaı-aq TJM-niń ushqyshsyz ushý apparattary men «Qazavıaqutqarý» tikushaǵy qatystyryldy, — delingen vedomstva aqparatynda.
Túrkistan oblysynyń tabıǵaty ásem bolǵanymen, taýly aımaqtarda qaýip-qater de az emes. Sondyqtan qutqarýshylar turǵyndar men týrısterge árdaıym qaýipsizdik erejelerin qatań saqtap, taýǵa shyqqanda daıyndyqpen barýdy eskertedi.
Aıta keteıik, budan buryn elimizde tótenshe jaǵdaıdan habardar etý qaǵıdasy jańarǵanyn jazǵan bolatynbyz.