Bir aqtalyp, qaıta qamaldy: Atyraý MÓZ-diń eks-bas dırektoryna túpkilikti úkim shyqty
Atyraý oblystyq sotynyń qylmystyq ister jónindegi alqasy Atyraý munaı óńdeý zaýytynyń eks-bas dırektory D. men satyp alý departamenttiń burynǵy dırektory S.-ǵa qatysty úkim shyǵardy, dep habarlaıdy Kazinform.
Oblystyq sottyń baspasóz qyzmetinen málim etkendeı, sottalýshylarǵa QR Qylmystyq kodeksiniń 361-babynyń 4-bóligi 3-tarmaǵymen aıyp taǵyldy.
Prokýror sottalýshy D.-ny memlekettik qyzmet atqarý quqyǵynan ómir boıyna aıyra otyryp, bas bostandyǵyn 7 jylǵa shekteý, al S.-ny memlekettik qyzmet atqarý quqyǵynan ómir boıyna aıyra otyryp, bas bostandyǵyn 6 jyl 6 aıǵa shekteý týraly surady.
Al advokattar D. men S.-nyń is-áreketterinde qylmystyq quqyq buzýshylyq quramynyń bolmaýyna baılanysty olardy aqtaýdy surady. Sottalýshylar da ózderiniń kinásiz ekendigin bildirdi.
Sot alqasy sottalýshylarǵa jaza taǵaıyndaý kezinde QR Qylmystyq kodeksiniń 55-babynyń talaptaryn eskergen.
«Sottalýshylardyń kinási qylmystyq is materıaldarymen tolyq dáleldendi. Olar aıyp taǵylǵan bappen kináli dep tanyldy. Qylmystyq ister jónindegi sot alqasynyń úkimimen D.-ǵa memlekettik qyzmette lazýazymdy atqarý quqyǵynan ómir boıyna aıyrý, bas bostandyǵyn 4 jyl 6 aı merzimge shekteý jazasy taǵaıyndaldy. Al S.-nyń bas bostandyǵy 3 jyl 6 aıǵa shekteldi. Ol da memlekettik qyzmette lazýazymdy atqarý quqyǵynan ómir boıyna aıyryldy», - dedi oblystyq sottyń baspasóz qyzmetinen.
Eske salaıyq, bıylǵy mamyrda Atyraý qalasynyń №2 sotynyń úkimimen Atyraý munaı óńdeý zaýytynyń burynǵy bas dırektory D. aqtalyp shyqqan bolatyn.
Keıin Joǵarǵy sottyń qylmystyq ister jónindegi sot alqasy zaýyttyń eks-bas dırektoryna qatysty aqtaý týraly úkimniń kúshin joıyp, isti qaıta qaraýǵa jiberdi.
Osyǵan baılanysty qarashada oblystyq sottyń qylmystyq ister jónindegi sot alqasynda Atyraý munaı óńdeý zaýytynyń eks-bas dırektoryna qatysty is qaıta qarala bastady.
Qylmystyq isti qaıta qaraý kezinde sot alqasynyń qaýlysymen Atyraý munaı óńdeý zaýytynyń burynǵy bas dırektory qamaýǵa alyndy.
