Bir akkaýnt úshin 10 jylǵa sottalýyńyz múmkin
ASTANA. KAZINFORM — Kolesa Group pen Bas prokýratýra ınternet-alaıaqtarǵa qarsy kúresti kúsheıtti. Sonyń arqasynda Kolesa.kz-tegi myńnan astam alaıaqtyq akkaýnt buǵattaldy.
Bas prokýratýra habarlandyrýlardy ornalastyrýǵa arnalǵan onlaın-platformalarmen turaqty túrde baılanys ornatyp, ózara is-qımyldy júzege asyryp keledi.
«Kolesa Group» kompanııasymen birlesken jumys aıasynda jarnama alańdarynda azamattardy aldaý úshin paıdalanylǵan 1 myńnan astam alaıaqtyq akkaýnt pen habarlandyrý buǵattaldy.
Ózara is-qımyldy odan ári nyǵaıtý maqsatynda Bas prokýratýra men «Kolesa Group» ınternet-alaıaqtyqqa qarsy is-qımyl jónindegi yntymaqtastyq týraly memorandýmǵa qol qoıdy.
Taraptar aqparatpen jedel almasyp, qylmystyq isterdi tergep-tekserý barysynda qajetti derekterdi usynyp, sondaı-aq alaıaqtyq akkaýnttar men habarlandyrýlardy buǵattaý jóninde sharalar qabyldaıtyn bolady.
Bul qylmystarǵa qatysy bar adamdardy neǵurlym jyldam anyqtaýǵa jáne olardyń qylmystyq áreketteriniń jolyn kesýge múmkindik beredi.
Bas prokýratýra jarnama alańdarynyń paıdalanýshylaryn óz akkaýnttary men derekterin alaıaqtarǵa berýdiń jaýaptylyǵy týraly eskertedi.
— Eger olardyń qandaı maqsatta paıdalanylatynyn bilmeseńiz, basqa adamdardyń ótinishi boıynsha eseptik jazbalar ashyp, habarlandyrýlar ornalastyrmańyz. Mundaı jaǵdaıda akkaýnt ıesi alaıaqtyqqa kómektesýshi retinde qylmystyq jaýaptylyqqa tartylýy múmkin. Bul úshin 10 jylǵa deıingi merzimge bas bostandyǵynan aıyrý túrindegi jaza kózdelgen, — dep túsindirdi mamandar.
Buǵan deıin Astanada marketpleıs júrgizý boıynsha oqytý qyzmetin usynyp, alaıaqtyq jasaǵan áıel sottalǵanyn jazǵanbyz.
