Bir adamnyń 82 tisi «emdelgen» - depýtat MÁMS kemshilikteri týraly

ASTANA. KAZINFORM – Mindetti áleýmettik medıtsınalyq saqtandyrýdyń qazirgi modeli medıtsınany halyqqa qoljetimsiz etip, shyǵyndy kóbeıtip, qarajattyń tıimsiz jumsalýyna ákelip otyr. Bul pikirdi Májilis depýtaty Ashat Aımaǵambetov aıtyp, júıeniń kemshilikterin synǵa aldy.

− MÁMS boıynsha 5 aılyq balanyń tisi qanqurttan emdelgen. Bes aıynda tisi shyqpaǵan balany qalaı emdeýge bolady? Basqa bir adamnyń 82 tisi emdelgen, soǵan qarajat tólesin dep qorǵa esep berilgen. Sosyn bir kúnde bir adamǵa bir aýrýhana 32 qyzmet kórsettik dep esep toltyrǵan. MÁMS qarjylandyrý júıesiniń ózi artyq qyzmet kórsetý men «qosyp jazýǵa» ıtermeleıdi. Sebebi qarajat ár emdelgen jaǵdaıǵa emes, ár qyzmetke tólenedi, - deıdi Ashat Aımaǵambetov.

Onyń aıtýynsha, júıede normatıvter men tsıfrlandyrý joq, al klınıkalyq hattamalar men standarttar anyq emes.

− Taǵy bir dálel, buryn osteohondrozdy rentgensiz de anyqtaıtyn. Keıin rentgen qoldanyla bastaldy. Jaraıdy, durys. Al endi qazir osteohondrozdy anyqtaý úshin bir naýqasqa rentgen, odan keıin KT, sosyn MRT jáne basqa da qosymsha tekserýler taǵaıyndalady. Bunyń bári aqsha tabýdyń «zańdy» joly. Sebebi aıtpasa da túsinikti. Neǵurlym kóp qyzmet kórsetilse, klınıka soǵurlym kóp paıda tabady. «Osyndaı beıbereketsizdik bireýge tıimdi bolyp otyr ma?» degen oıda qalasyń, - deıdi Májilis depýtaty.

Búgin Májilis tóraǵasynyń orynbasary Danııa Espaeva Úkimet saǵatynda adamdardyń medıtsınalyq qyzmetterdiń kórsetilýine qanaǵattaný deńgeıi tómendegenin, MÁMS-ke qatysty berilgen naqty usynystar oryndalmaı otyrǵanyn aıtqan edi.

Óz baıandamasynda Densaýlyq saqtaý mınıstri Qazaqstanda ólim azaıǵanyn, ómir súrý uzaqtyǵy artyp, salany qarjylandyrý kólemi artqanyn aıtýda.

Sondaı-aq, Aqmaral Álnazarova medıtsınalyq saqtandyrýǵa qatysty jańa zańnamada qandaı ózgerister bolatynyn aıtyp berdi.