Bir adamdy óltirip, ekinshisin de pyshaqtaǵan Ekibastuz turǵyny 16 jylǵa sottaldy
ASTANA. KAZINFORM – Ekibastuzdyń 28 jastaǵy turǵyny er adamdy óltirip, áıeldi óltirmek bolǵany úshin 16 jyl 6 aıǵa bas bostandyǵynan aıyryldy, dep habarlaıdy Kazinform tilshisi.
Іs materıaldaryna sáıkes, qylmys 2026 jylǵy 9 qańtarda birge ishimdik iship otyrǵan kezde jasalǵan. Sottalýshy men dastarqan basynda bolǵan áıelderdiń biri arasynda turmystyq janjal týyndap, keıin ol shabýylǵa ulasqan.
Sot málimetinshe, aldymen sottalýshy áıelge dene jaraqatyn salǵan. Keıin páterge qaıta oralyp, sol sátte uıyqtap jatqan er adamǵa pyshaqpen ólimge ákeletin jaraqattar salǵan. Budan soń ol áıelge qaıta shabýyl jasaǵanymen, jábirlenýshige der kezinde medıtsınalyq kómek kórsetilgendikten, qylmysyn sońyna deıin jetkize almaǵan.
– Páterge qaıta oralǵan sottalýshy jábirlenýshiniń birge turatyn azamaty ózinen kek alýy múmkin dep qaýiptenip, ol uıyqtap jatqanda ómirin qııýdy sheshken, – dedi Pavlodar oblysynyń qylmystyq ister jónindegi mamandandyrylǵan aýdanaralyq sotynyń sýdıasy Nurlan Qaıyrbekov.
Sot áıeldi kisi óltirý jáne adam óltirýge oqtalý baptary boıynsha kináli dep tanyp, qylmystar jıyntyǵy boıynsha 16 jyl 6 aı merzimge bas bostandyǵynan aıyrdy.
Sondaı-aq sot burynǵy úkim boıynsha ótelmegen jaza merziminiń bir bóligin qosyp, jazany taǵy alty aıǵa uzartty.
Sot málimetinshe, sottalǵan áıel ótken jyldyń jazynda shartty túrde merziminen buryn bosatylǵan.
Aıta keteıik, buǵan deıin Ekibastuzda kisi óltirdi jáne ekinshi adamdy óltirýge oqtaldy degen kúdikpen áıeldiń ustalǵany habarlanǵan edi.
