Bir adam máslıhat tóraǵasy bolyp qatarynan eki retten artyq saılana almaıdy — zań
ASTANA. KAZINFORM — Búgin Senattyń jalpy otyrysynda «Qazaqstan Respýblıkasyndaǵy keıbir zańnamalyq aktilerine memlekettik basqarý jáne jergilikti ózin-ózi basqarý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
Zańnyń maqsaty — jergilikti ókildi organdardyń ókilettikterin keńeıtý, memlekettik jáne jergilikti ózin-ózi basqarýdyń qarjylyq negizin nyǵaıtý, sondaı-aq jergilikti deńgeıdegi memlekettik basqarýdyń tıimdiligin arttyrý. Zańmen Qazaqstan Respýblıkasynyń 7 kodeksine jáne 19 zańyna ózgeris pen tolyqtyrýlar engiziledi. Túzetýlerdiń birinshi blogy jergilikti ózin-ózi basqarý máselelerine qatysty.
— Atap aıtqanda, máslıhattardyń ókilettikteri keńeıtiledi. Olarǵa ákimderdiń halyqpen kezdesýleri barysynda kóterilgen máselelerdi sheshý jónindegi is-qımyl josparlaryn júzege asyrý qorytyndylaryn qaraý, bıýdjet komıssııalarynyń jumysyna qatysý, eldi mekenderdi sanıtarlyq tazalaý qaǵıdalaryn bekitý, sondaı-aq tekserý komıssııalarynyń tóraǵasy men múshelerine tártiptik jaza qoldaný quqyǵy beriledi. Sonymen qatar, máslıhat tóraǵasy men máslıhat apparaty basshysy ókilettikteriniń arajigi ajyratylady, máslıhat depýtattarynyń saýaldaryna jaýap berý merzimderi otyzdan on bes kúnge deıin qysqartylady, jergilikti qoǵamdastyq jınalystarynyń ókilettikteri keńeıtiledi. Bir tulǵanyń bir oblys, respýblıkalyq mańyzy bar qala jáne astana, aýdan máslıhatynyń tóraǵasy bolyp qatarynan eki retten artyq saılana almaıdy, — dedi senator Serik Shaıdarov.
Onyń aıtýynsha, jergilikti ózin-ózi basqarýdyń qarjylyq derbestigin nyǵaıtý maqsatynda aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń bıýdjetterine qosymsha kiris kózderin berý eskerilgen. Zańdy tulǵalar men jeke kásipkerlerdiń múlik salyǵynan túsetin túsimderiniń bir bóligi, qyzmettiń jekelegen túrlerimen aınalysý quqyǵy úshin lıtsenzııalyq alymdar, sondaı-aq jekelegen ekologııalyq aıyppuldardyń jekelegen túrleri beriledi.
Túzetýlerdiń kelesi blogy jer qatynastary men ınvestıtsııalyq jobalardy iske asyrý máselelerine arnalǵan. Investıtsııalyq jobalardy iske asyrý úshin jer ýchaskelerin berý tetikteri jetildiriledi, qoǵamdyq talqylaýlar ótkizý tártibi naqtylanady, sondaı-aq sáýlet, qala qurylysy jáne qurylys salalaryndaǵy protsesterdi tsıfrlandyrý jalǵasady.
— Jekelegen túzetýler turǵyn úı qatynastaryn jetildirýge baǵyttalǵan. Atap aıtqanda, jalǵyz turǵyn úıi apattyq dep tanylǵan azamattardy turǵyn úımen qamtamasyz etý tetikteri naqtylanady. Sonymen birge, atqarýshy organdar ońaltý rásiminen ótip jatqan kommýnaldyq menshiktegi jekelegen energııa óndirýshi uıymdardy sýbsıdııalaýdy júzege asyrady, — dedi depýtat.
Budan bólek, densaýlyq saqtaý salasynda qosalqy reprodýktıvtik ádister men tehnologııalardy qoldanýdy retteıtin erejeler, sondaı-aq sýrrogat ana bolý máseleleri naqtylanady.
Sondaı-aq qujatta mektepke deıingi jáne orta bilim berý salasyndaǵy jergilikti atqarýshy organdardyń jekelegen quzyretterin oblystyq deńgeıden aýdandyq jáne oblystyq mańyzy bar qalalar deńgeıine berý kózdeledi. Osyǵan baılanysty Bıýdjet kodeksine mektepke deıingi jáne orta bilim berýge arnalǵan tıisti shyǵystardy oblystyq deńgeıden aýdandar men oblystyq mańyzy bar qalalar deńgeıine qaıta bólý kózdelip otyr
— Ózderińizge belgili, Qurylys kodeksinde «tolyq bitirip beriletin» jobalary uǵymy engizilgen. Osyǵan baılanysty osyndaı jobalar boıynsha memlekettik mindettemelerdi oryndaýǵa qatysty bıýdjet zańnamasynyń jekelegen erejeleri naqtylanady, — dedi senator.
