BP sońǵy 25 jyldaǵy eń iri munaı-gaz ken ornyn ashty
ASTANA. KAZINFORM — Brıtandyq munaı-gaz kompanııasy BP (British Petroleum) Brazılııa jaǵalaýynda sońǵy 25 jyldaǵy eń iri munaı-gaz ken orny ashylǵanyn habarlady.
«Býmerang» dep atalatyn ken orny eldiń ońtústik-shyǵysynda, Rıo-de-Janeırodan 404 shaqyrym jerde ornalasqan Santos basseıninen tabylǵan.
Ken orny Atlant muhıtynda, tuz qabatynyń astynda ornalasqan. BP 2022 jyldyń jeltoqsan aıynda aýktsıonda aımaqtaǵy mıneraldy resýrstardy óndirý quqyǵyn jeńip aldy. Kásiporyn tereńdigi 5855 metr uńǵyma burǵylap, jalpy aýdany 300 sharshy shaqyrymnan asatyn paıdaly qazbalardyń qoryn anyqtady.
Kómirqyshqyl gazynyń kontsentratsııasynyń joǵarylaýy óndiristi qıyndatyp, óńdeý shyǵyndaryn arttyrýy múmkin ekendigi atap ótildi. Qazirgi ýaqytta BP ken ornynyń áleýetin naqty anyqtaýǵa múmkindik beretin qosymsha zerthanalyq zertteýler júrgizip jatyr.
«Býmerang» — 2025 jyly BP ashqan onynshy munaı-gaz ken orny. Buǵan deıin kompanııa mamandary tek Brazılııada ǵana emes, sonymen qatar Trınıdad, Mysyr, Meksıka shyǵanaǵy, Lıvııa, Namıbııa jáne Angolada ken oryndaryn ashqan bolatyn.
Eske sala keteıik, ótken jyly Qytaıda 1 mıllıon tonna qory bar Azııadaǵy eń iri lıtıı ken orny ashylǵan edi.