Bozjyrada alǵashqy qonaqúı qurylysy bastaldy — ákim Mańǵystaý týrızmi týraly
ASTANA. KAZINFORM — Mańǵystaý óńirine keletin týrısterdiń sany artyp keledi. 2025 jyldyń 9 aıynda 350 myńnan astam týrıst kelip, 17,2 mlrd teńgege qyzmet kórsetilgen. Bul týraly oblys ákimi Nurdáýlet Qılybaı eseptik kezdesýde aıtty.
Ákimniń aıtýynsha, sheteldik týrısterdi qabyldaý boıynsha Mańǵystaý oblysy 3-orynda tur. Al Aqtaý áýejaıy jolaýshylar aǵyny boıynsha 4-orynda tur. Sońǵy bes jylda áýejaıdaǵy jolaýshylar aǵyny 70%-ǵa artyp, 996 myńnan 1,7 mln adamǵa ósti.
— Osy jyly Dýbaı, Núkis baǵyttary jańadan ashylyp, 2026 jyldan bastap Qytaıǵa (Úrimshi) tikeleı reıster ashylady. 2026 jyldyń ekinshi jartyjyldyǵynda 1,3 mln jolaýshy qabyldaıtyn múmkindigi bar Kendirli áýejaıynyń qurylysy aıaqtalady, — dedi N. Qılybaı elordada Ortalyq kommýnıkatsııalar qyzmetinde.
Sonymen birge, 3 temirjol vokzalyn rekonstrýktsııalaý jumystary aıaqtalýda, tolyqtaı 2026 jyldyń birinshi jartyjyldyǵynda qoldanysqa beriledi.
Al 2025-2029 jyldary quny 198 mlrd teńgeni quraıtyn 17 týrıstik ınvestıtsııalyq jobalardy iske asyrý josparlanýda. Bıyl quny 4,6 mlrd teńgeni quraıtyn 4 joba iske qosyldy.
— Týrızm ınfraqurylymyn kezeń-kezeńmen iske asyrý boıynsha naqty jospar bar. Birinshiden, Bozjyra baǵytyn damytý, osy oraıda bıyl 13,2 shaqyrymdy quraıtyn jol qurylysy bastaldy, 2026 jyly elektr júıesin tartamyz. Bozjyra shatqalynda sapar ortalyǵynyń qurylysy aıaqtalyp, aldaǵy týrısttik maýsymda iske qosylady. 2026-2029 jyldary 17,5 mlrd tenge bolatyn 3 joba iske asyrylady. Qazir birinshi qonaqúıdiń qurylysy bastaldy, — dedi oblys ákimi.
Óńir ákimi Mańǵystaýda birneshe termaldy kózder ornalasqanyn, sýdyń quramy Karlovy Vary, Esentýkı sııaqty áıgili kýrorttarǵa teń ekenin atap ótti. Osy oraıda, termaldy basseınderi bar 150 orynǵa arnalǵan sanatorıı-kýrorttyq kesheni salynyp jatyr. Jobanyń jer telimi anyqtalyp, jobalaý jumystary men qarjylandyrý bastaldy. Qurylys 2026 jyly bastalyp, 2027 jyldyń 2 toqsanynda aıaqtalady.
Sonymen birge, qurylysy toqtap turǵan ǵımarattardy jańǵyrtý jáne olardy tıimdi paıdalaný jumystary basty nazarda. Aqtaý qalasynda 3 jyldan beri toqtap turǵan sanatorıı-kýrorttyq keshen jobasyn qarjylandyrý jumystary bastalýda. Jobany 2026 jyldyń aıaǵyna deıin aıaqtaý josparǵa qoıyldy.
Bıyl Mańǵystaý oblysynda ekonomıkalyq ósimniń negizgi kórsetkishteri oń dınamıka kórsetken. Óńir ekonomıkasynyń negizgi baǵyttary — óńdeý ónerkásibi, týrızm, logıstıka jáne balyq sharýashylyǵy bolyp otyr.